МагъчIваялъе рес

МахIачхъалаялда ресукъал гIадамазе нигIматаздалъун кверчIвай рахIмуялъул фондаз гуребги, тукабазги гьабизе байбихьун буго. ТIоцебе гьединаб иш байбихьун буго «Эхнатон» абураб тукада. Гьеб тукада гIумруялде бахъинабулеб буго чанго батIияб социалияб проект.

Гьал къояз Италиялъул диваналда ритIухъ гьавун вуго вакъиялъ квен бикъарав чи. Ракъи буссинабизе квен бикъи такъсирлъун рикIкIине бегьуларин абураб хIукму къотIун буго диваналъ.

ТIолго дунялалда тIибитIулеб буго рахIмуялъул акцияби, кваназе квен гьечIезе нигIматаздаллъун ва хIадрараб кванидалъун кумак гьабулел. Гьедин, Гуржиялъ Тбилиси шагьаралда баккун буго жамгIияб холодильник.

Гьениб гьабураб квен лъолеб буго гIадамаз, хIажат ккараз кваназе босизе. Гьединабго рахIмуялъул акция гIумруялде бахъинабулеб буго Чехиялда. Сунца тIамурал гьединаб акция тIобитIизеяли баян гьабулаго гIуцIарухъабаз лъазабулеб буго, гIадамаз росулел кванил нигIматазул цо бутIа кваначIогон, гIодобе балеб бугин.

Гьеб исрап гьабичIого, хIажатазе кьезе рес кьолеб бугин гьеданаб жамгIияб холодильникалъ. Дагъистаналда хIажат ккаразе кванил нигIматал кьолел акция тIобитIулеб буго чанго тукада, бищун цебе гьелъие кьучI лъураб кколеб буго «Эхнатон» абураб тукен МахIачхъалаялда бугеб.

«Чед босизе рес гьечIес, гьеб чIобого босизе бегьила»,-ян абураб хъвай-хъвагIай буго чеб бичулеб бутIаялда цебе чIван буго гьеб тукада. Гьеб социалияб проект тукада тIобитIулеб бугелдаса балеб буго чанго моцI. Гьеб заманалда жаниб гьениб баккун буго чед гуребги, цогидал кванил нигIматал чIорого росизе рес кьолеб акция.

Рес гьечIезе чед гьадинго кьезе пикру тукадул нухмалъулев АхIмад СайгидхIусеновасул бижун буго гьев СагIудиялде щун хадуб. Гьеб улкаялда щибаб тукада гIадин ресукъал гIадамзе чед чIобого кьолила. Дагъистаналда гьединаб мисал бихьизаби чара гьечIого хIажатаб букIанин бицана гьес «Эркенлъи» радиоялъе.

АхIмад СайгидхIусенов: «Жиндирго чвантил гурого, батIияб жоялъул ургъел гьечIезда бихьуларо, кинаб хIалалда ругел ресукъал гIадамал. Жакъа Дагъистаналда кIудияб кIвар буго рахIмуялъул кумекалъул. Дида лъала МахIачхъалаялда руго чанги хъизамал, къасиялде кваназе гIицIго белъараб макаронал ругони рохулел. Гьединаб акция цогидал тукабазги гьабулеб бугони, хIисаб гьабеха, кигIан бигьалъизе бугеб гьединаб хIалалда ругел гIадамазул гIумру».

Нах, чакар, цIам, пиринчI ва цогидал нигIматал гьединго чIорого росизе ва садакъаде цогидаз росизе лъезе бегьулеб бакI буго гьединго тукада. Гьеб акция Эхнатоналда тIобитIулеб буго «Инсан» абураб рахIмуялъул фондгун цадахъ. Жидер тукадаса мисал босун цогидазги байбихьун бугин гьединаб акция тIобитIизейин бицана тукадул нухмалъулев АхIмад СайгидхIусейновас.

АхIмад СайгидхIусейнов: «Ресукъазе кумак гьабизе бокьарал гIадамаз босун лъола гьениб батIи-батIиял нигIматал, яги гIарац кьун тола, рес гьечIев чи вачIани, гьесие хIажатаб босун кьезе. Нижеца гьеб акция тIобитIизе байбихьидал, чанго тукадул вакилзаби кIалъан рачIана, гьеданаб акция гьабизе бокьарал.

ГIагараб заманалда гьеб «Караван» абураб тукабазул гьиналда баккизе рес буго. Дида рагIана Гъизилюрт шагьаралъул тукадаги байбихьун бугин гьединабго акция. ГIадамазе цуцазе кумак гьабизе рес кьолеб буго гьелъ. Масала, цо кинаб бугониги фондалде гIарац кьезе щаклъулел ратани, босун кванил нигIматал кьезе бегьула, гьеб мухIканго лъала хIажат ккарас нахъе босулелъи».

Дагъистаналда, «Инсан» абураб рахIмуялъул фондалъул баяназда рекъон, кванил нигIматал росизе рес гьечIел, ресукъал хъизабазул къадар 3000 цIикIкIун буго. Гьединаб хIалалда ругел гIадамазе гьоркьохъаби гьечIогон кумак гьабизе рес кьолеб бугин бицана гьеб нигIматал чIорого росизе бегьулеб бакIалда цо-цо нигIматал лъолей ятарай гIаданалъ «Эркенлъи» радиоялъе.

Аминат: «Гьаниб МахIачхъалаялда киназулго гуро чед босизецин рес букIунеб. Чанги рукIуна рукIине рукъ гьечIел гIадамал, гьез кваназе чед чIоього босизе бегьула гьанисан. Дица ресалда рекъон, цо-цо садакъаде цогидаз росизе нигIматал лъола, гьел кидаго росун унги ратула, гIемерал гIадамаз росула гьениса нигIматал, аслияб куцалда херал чагIаз. ТIаде балагьунго бихьулеб букIуна, гьел рес бугел гIадамал гуреблъи. Гьаб акция буго кутакалда лъикIаб акция. Дида ккола гьеб киса-кибего букIине ккелин».

«Эхнатон» тукадул мисал босун буго ГIахъушиясул къватIалда бугеб «Тропики» абураб тукацаги. Дагь-дагьккун, гьеб лъикIаб мисал тIибитIилин хьул бугин абулеб буго тукадул нухмалъиялъ. Жакъа къоялъе, Дагъистаналда ругел цо хутIичIого тукабазул рес бугила рес гьечIезе чедгIаги чIобого кьезе.

Дур пикру

Комментариял рихьизаре

XS
SM
MD
LG