МагъчIваялъе рес

Бельгиялда терроралъул хIинкъи


Брюсселалъул къватI. 21Ноя2015

Брюсселалда ва гьелъул сверухълъиялда полициялъ хасаб операция тIобитIиялъул хIасилалда ккун вуго 16 чи. Гьедин лъазабулеб буго Бельгиялъул прокурорас. Улкаялъул премьерас лъазабулеб буго терроризмалъул хIинкъиялъул даража щаклъи бугел кквезегIан гIодобе гьабизе гьечIилан.

Парижалда 13 ноябралъул сардилъ тIадекIанциял гьариялда хурхун бищунго щаклъи бугев СалахI ГIабдусалам-гьезда гьоркьов вукIун гьечIо ва гьев валагьулев вуго.

Парижалде тIадекIанцIиял гьарулаго бищунго гIемер-90 чи чIван вукIана «Батаклан» абулеб концертазул залалда. Гьениве Франциялъул президент Франсуа Олландида цадахъ щварав Британиялъул премьер-министр Дэвид Кэмероница абуна жинда ракIалда бугин Сириялда ИГИЛалъул позициязда авиакьаби щвезабизелъун улкаялъул парламенталда изну гьаризейин.

Брюсселалда ва Шарлеруаялда 19 рокъоб бан буго чIухь, амма гьенир я ярагъ яги цоги кьвагьулел жал ратун гьечIо.

ТIадекIанцIиял гьаризе рес бугел чагIазде данде хасал операцияби халат рахъунел руго Бельгиялда. Улкаялъул полициялъ информалатазда гьарулеб буго гьел операциязул мухIканлъаби къватIире кьогеян ва гьединго гьез гIадатиял гIадамазда гьарулеб буго гьел операциял тIоритIулел ругел бакIал социалиял сайтаздасан лъазаругейин.

Брюсселалда лъазабун букIана террористияб хIинкъиялъул, бищунго кIудияб-ункъабилеб даража. Улкаялъул премьер-министр Шарль Мишелица гьатIан къоялда лъазабун букIана гьеб даража жеги, бищунго дагь, цо сордо-къоялъ цIунун тезе бугин. Гьесул рагIабазда рекъон, Парижалда гIадинал тIадекIанцIиял Бельгиялда гьариялъулги кIудияб хIинкъи буго.

Гьес абуна цо ГIабдусалам гурониги жидеца ралагьулел чагIи гIемерал ругин ва гьездаса улкаялъе кIудияб хIинкъи бугин.

Шарль Мишель: « Дица абулеб буго, дица гьедин сонги лъазабун букIана, Парижалда гIадинал тIадекIанцIиял гьанирги гьариялъул хIинкъи бугин. Рес буго чанго чияс чанго батIи-батIияб бакIалда гьел тIадекIанцIиял гьаризеги. Нижехъ ругел баяназда рекъон, гьез ишаналъе росизе рес буго гIадамал гIемерал бакIал. Масала, коммерциял централ, дармил централ, жамгIияб транспорт».

Хасал хъулухъазул щаклъи буго гьез валагьулев вугев 29 сон барав ГIабдусаламица Сириялде тIадвуссине ресал ралагьулел ратиялда. Гьев Франциялдаса нахъе вачунев вукIарав чияс жиндирго адвокатасе бицун буго ГIабдусаламида тIад ретIун букIанин кIудияб чIегIераб гужгат ва рес букIанин гьесда тIад хвалде унесул рачел букIинеги, амма гьес гьеб кьвагьизабичIин.

Бельгиялъул телевидениялъе интервью кьолаго гьесул вац МухIамад ГIадусаламица СалахI ахIана кверде вачIине, хабалъ вукIуналдаса жиндие мун туснахъалъув вукIине бокьилин абун. Гьес рикIкIунеб буго жиндир вац лъицIа-вукIаниги гуккун мекъаб нухде ккезавун вугин.

Бельгиялъул премьерасул рагIабазда рекъон, улкаялда хIинкъи букIиналъул даража ГIабдусалам кквезегIан гIодобегIан гьабизе гьечIо.

XS
SM
MD
LG