Гьенире ракIарун рукIана Шималияб Кавказалда Россиялъул президентас тарав вакил Сергей Меликовги, киналго республикабазул бутIрулги, журналисталги.
Унго-унгояб журналистикаялда ва пиаралда, гьединго унго-унгояб критикаялдагун провокациялда гьоркьоб букIунеб гIорхъиялда тIасан ккана гьениб аслияб гара-чIвари.
Игорь Бариновас гьеб форумалда гьабураб лъазабиялда бан, «Черновик газеталъул бетIерав редактор Маирбег Агаевас нахъисеб къоялъго кьуна газеталъул официалияб сайталдасан жавабги.
Жидеца киданиги ритIухъ гьаричIин Россиялъул аэроплан бортизабурал Туркиялъул рагъулал хъулухъчагIи, гьединго хутIараб кIиябго газеталъги гьабичIин хъвалеб буго гьеб жавабалда. Амма жидер газеталъ ихтияр кьолила чанго батIияб бакIалъан рачIунел баянал рагIизе. Официалиял газетазда гьединаб ихтияр щоларила цIалдолесе. Гьеб данде кколеб батичIони, Бариновасул лъазаби пачалихъалда дандечIараб лъазабилъун рикIкIунила жидецаги. Гьедин хъвалеб буго «Черновикалъул» сайталда Маирбег Агаевас.
Пачалихъиял хъулухъазул нухмалъуда гIураб хIадурлъи гьечIел, ургъичIого рагIи абулел гIадамал рукIиналъ кколел ругин цо-цо мехалда журналистазул хIалтIулъги захIмалъабиян абуна ЭР-гун букIараб гара-чIвариялда «Новое дело» газеталъул бетIерав редактор ХIажимурад Сагитовас.
Гьес щаклъи загьир гьабулеб буго Бариновас тIокIалъ чIечIого «Новое дело», «Черновик», «Республика» газетал цIалулел ратиялда. Гьединлъидал гьеб живго Бариновасул къимат гурин абулеб буго ХIажимурад Сагитовас.
ХIажимурад Сагитов: «Гъоб буго гьаниве, Дагъистаналде, вачIиндал, гъосда цо лъица букIаниги ракIалде ккезабураб пикру. Гьединаб буго хъулухъазда тарал цо-цо чагIазул хасият – къимат кьезе жидерго гIакълуги гIечIого, гIадамаз бицараб жоялда хадурги ун кколел руго цо-цо гъалатIал. Гьединал нухмалъулел рукIаго, нилъер пачалихъалда киданиги букIине гьечIо гIадлу. Гьединал нухмалъулел рукIаго, тушбабигицин къваригIунаро нилъее. Щайин абуни гьединал нухмалъулез жидецаго данде базабулелъул халкъ. Цо чиясда цIогьор, цIогьорилан тIокIалъ чIечIого абулеб бугони, жамагIаталдаги гьединан ракIалде ккеларищ, гьеб мехалда дов чиги, ццимги бахъун, жамагIаталда чIечIого вукIинищ?
Нижеда гIайиб чIвазе бакI батани, Баринов гьанжелъагIан щай вуцIцIун чIун вукIарав? Хъархъида нахъа вахъун чIарав ГАИялъуласул гIадаб хIалтIи буго гъосул гъоб (шоферасда гIайиб ккезегIан чIолев ГАИялъулав). ГIайиб ккезени киданиги чIечIо ниж. Нилъер ватIаналда данде рагъ гьабулел чагIазул рахъалда киданиги букIинчIо нижер газета. БукIинеги гьечIо киданиги».
«Новое дело» газеталъул редакциялда ракIалда буго къогогIан соналъ биччалеб бугеб жидер газеталда бугьтанал лъолел рукIиналъ Бариновасда тIасан диваналде гIарза хъвазе.
ХIажимурад Сагитов: «Баринов гIадал чагIаз чIумалъ рехсезе ккарал чагIи гуро ниж. I99I соналдаса нахъе медиарынокалдаги ругел, батIи-батIиял пикрабиги халкъалъухъе щвезарулел чагIи. Бариновас гIайибал чIвазе кколел чагIи гуро».
ХIажимурад Сагитовасда квеш букIун буго Пятигорскалда рукIарал Дагъистаналдаса хъулухъчагIазги журналистазги Бариновасе жаваб кьечIого тей.
ХIажимурад Сагитов: «Щай цониги дагъистанияс тIадеги вахъун абичIеб къватIиб чIвазабейин гьезул (журналистазул) хIалихьатаб цониги иш. ГIемерисезул ццим бахъун буго нижеца битIаралда битIарабин абулеб букIиналъ. Гьеб хIехьезе кIвечIого, гьелда данде жавабги кьезе кIвечIого чIвана нижер кIиго хIалтIухъан».
Жал экстремистазе квербакъулел чагIи ратани, жидее интервью щайинха кьун букIараб Шималияб Кавказалда тарав Россиялъул президентасул вакил Сергей Меликовасги, Дагъистаналъул бетIер Рамазан ГIабдулатIиповасги, гьединабго даражаялъул цогидал политиказгиян суал лъолеб буго ахиралдаги «Новое дело» газеталъул бетIерав редактор ХIажимурад Сагитовас.
