МагъчIваялъе рес

Нилъерабин абулеб щиб кколеб?..


ХIинкъигьечIолъиялъул рахъалдаса Россиялъул президентасул кумекчи Николай Патрушевасул вас лъазавун вуго «Соналъул банкирлъун». Щай гьеб хIужаялде кIвар буссинабулеб бугеб? Щайгурелъул Дмитрий Патрушевас нухмалъулеб банкалъул соналъул хIалтIул хIасилал гIуралъ пашманал рукIиналъ ва премиялъул авторлъун кколеб  Россиялъул банказул ассоциацияялда гьеб хIужа лъалеб букиналъ.

2000 соналда Россиялъул президент Владимир Путинил буюриялда рекъон улкаялъул агропромышленныяб комплексалъе гIарцил квербакъиялъул мурадалда рагьараб Росселхозбанкалъул талъиялъул бетIерлъун ккола Дмитрий Патрушев, цеве улкаялъул хIинкъигьечIолъиялъул идараялъул бетIерлъун вукIарав Николай Патрушевасул вас.

Росселхозбанкалъул вэб-сайталда бахъараб лъазабиялда абулеб буго, миллияб экономика, хасго Россиялъул агропромышленнияб комплекс цебетIеялъе Дмитрий Патрушевас гьабураб кIудияб хIалтIиялъе жюриялъ кIудияб къимат кьолеб бугин. «Макроэкономикиял захIматал шартазде ва Цолъарал Штатаз, Европаялъ ва цогидал улкабаз лъазарурал санкциязде балагьичIого, банкалъ 2015 соналда гIуралъ цIикIкIинабуна росдал магIишаталъе гьабулеб квербакъи. Гьелдалъун гьелъ бихьизабуна кьурал ва кьолел циял кредитазул къадар улкаялда бугеб гьоркьохъеб дражаялдаса цIикIкIинабун букIин», – ян абулеб буго гьединго сайталъул лъазабиялда.

Импортозамещение, ай къватIисан бачIине кколеб букIараб квен-тIехх, къайи ва цогидалъул бакIалда жибго улкаялъул жанисел ресал хIалтIизари ккола Москваялъ Крымалъул аннексия гьабун хадуб загьирлъулеб халкъаздагьоркьосеб тIадецуйялъе жаваб хIисабалда Россиялъул хIукуматалъ гьабизе кколеб кьучIияб гали. Гьединал шартIазда улкаялъул бизнесалъе кумек гьабиялъул рахъалда кIудияб роль хIазе ккола финансазул институтаз.

Россельхозбанкалъул сайталда лъураб информациялда рекъон, Moody’s ва Fitch абурал Магърибалъул рейтингалъул агентлъабазда рекъон, гьеб банк рикIкIине кколеб буго спекулятивияб финансазул институтазул катеригориялда гъорлъ.

Дмитрий Патрушевасе хIурматияб цIар кьеялъул информация бахъана 23 декабралда. Амма гьеб хIужжаялде Россиялъул информалатаз гьанже гурони кIвар буссинабичIо.

Россиялъул банказул ассоциациялъ Патрушевасул хIалтIуе лъикIаб къимат кьолеб букIаниги, «Росбалт» гIадал информалатаз ва интернет-сурсатаз кIвар буссинабулеб буго Росселхозбанкалъул отчетазда бихьизабуралде. 2015 соналъул тIоцебесеб лъабго кварталда жаниб банкалъул букIун буго 68 миллард ганаб гъурщил, ай жакъасеб курсалда рекъон, 901 миллион долларалъул зарал.

Жидеде данде халкъаздагьоркьосел санкцияби лъазарурал идарабазда гъорлъ букIиналъ, Россельхозбанкалъе нухал къан руго къватIисан фондал щвеялъе. 2015 соналъул марталда Россиялъул премьер-министр Дмитрий Медведевас лъазабун букIана, къватIисел сурсатазде нух къан букIиналда бан, кризис-менеджменталъул гIорхъабазда, хIукуматалъ Россельхозбанкалъе кьезе бугин 10 миллиард гъурущин. Ай доб заманалъул курсалда рекъон гьеб ккола 177 миллион доллар.

Дмитрий Патрушев Россельхохбанкалъул нухмалъиялъул бетIерасул хъулухъалде тIамун вукIана 2010 соналда, 33 соналъул гIел бугеб мехалда.

XS
SM
MD
LG