Кьвагьиялъул хIасилалда лъиениги зарал ккечIо. БакIалъул гIадамаз бицухъе,
гьеб букIун буго кванил нигIматал ричулеб тукен. Гьединго гьениб гIаракъи-чагъирги бичулеб букIун буго. Гьеб бичулеб букIин гIиллалъун кканила тукен кьвагьизабиялъейилан абулеб буго шагьаралъул гIадамаз. Гьезулго пикруялда разилъулел руго къуваталъул идарабазул вакилзабиги.
Дагъистаналъул жанисел ишазул министерлъиялъул пресс-хъулухъалъул хIалтIухъабаз «Эркенлъи» радиоялъе бицухъе, гьеб тукадул бетIергьанасухъе изну гьечIого яргъидгIуцIаразухъан цере-цереги ругьалаби рачIун рукIун гьениб гIаракъи-чагъир бичугейиланги абун. Гьезухъ гIинтIамичIолъиялъухъ рецIел босун кьвагьизабун батизе бугин тукенилан бицана пресс-хъулухъалда.
Гьеб кьвагьи гьабурал чагIи щалали чIезаризе хасал тадбирал тIоритIулел руго низам цIунулез. Гьезухъе щун буго тукада лъугьа-бахъунеб бахъулеб видеокамераялъул баянги. Гьелда лъикIабун бихьичIониги, гIезегIан бичIчIулеб хIалалда рихьулел ругила гьеб кьвагьулеб жо тукадул кIалтIа лъолев кIиго гIолилавин бицана полициялда.
МухIканал гурел баяназда рекъон, кьвагьулеб алаталъул къуват букIун буго тротилалъул эквиваленталда рекъон, бащадаб килограммалда бащадаб. Кьвагьиялъул кутакалъ жибго гьеб тукен тIубан щущазабун буго, аскIор рукIарал тукабазеги зарал ккун буго.
Ахирисеб гьединаб хlужа Дагъистаналда ккун букlана январь моцlалда. Доб мехалда кьвагьизабун букlана Хасавюрталда тукен.
