МагъчIваялъе рес

Дагъистаналъул цIияб гимн


Дагъистаналъул цIияб гимналъул нотаби

Парламенталъ къабул гьабун буго Дагъистаналъул цIияб гимн

25 февралалда Дагъистаналъул парламенталъ къабул гьабуна кIиго соналъ жинда сверухъ дагIба лъугIичIеб гимн.

Расул ХIамзатовасул рагIабазда данде Мурад Кажлаевас хъвараб бакъан буго гьелъул. Гьеб суал гьоркьоб лъедал, жибго парламенталдаги баккун букIана дандечIей. РакIалде кканщинахъе хисулел жал рукIунарин пачалихъиял гIаламаталилан. Гимн хисилалде цебе жеги гIезегIан хиса-басиял гьаризе къваригIун ругин республикаялдаян. Гьелда тIасан пикру загьир гьабуна республикаялъул бетIер Рамазан ГIабдулатIиповасги.

Гимн букIунин миноралдалъун гуреб, мажоралдалъун ахIулеб жоян бичIчIизабулеб букIана республикаялъул бетIер Рамазан ГIабдулатIиповас парламенталда гIодорчIаразда. Гьезда гьел рагIабазул магIнаги бичIчIизабеян релъулел журналисталги рукIана.

ПалхIасил, ахирги рагIалде бахъана Дагъистаналъул гимналда сверухъ кIиго сонидаса цIикIкIун мехалъ халатбахъараб дагIба. Комиссиялде бачIараб ункъо варианталъул цояб къабул гьабуна парламенталъ. Мурад Кажлаевасул бакъанги Расул ХIамзатовасул рагIабиги ккола гьел. Гьале гьеб.

Дагъистаналъул гимналъухъ гIенеккараб парламент
please wait

No media source currently available

0:00 0:00:49 0:00

Ширвани Чаллаевас хъвараб бакъан гурони, рагIаби рукIинчIо цебесеб гимналъул. Хварав чиясде гьабураб магIуялда релълъунеб бугин гьебилан, цIияб ургъизе тIадкъай кьун букIана Рамазан ГIабдулатIиповас.

Хварав чиясде гьабураб магIуялда релълъинабун гьес хъвараб бакъангун, Чаллаев щай гIодовегIан гьавулевилан кIалъана парламенталда коммунистазул депутат МухIамад МухIамадов.

МухIамад МухIамадов: «Щиб лъалеб, метерисеб къоялъ лъие бугониги гербги рекIее гIечIого букIине бегьула. Россиялъул гербалда цIумил кIиго бетIер щай бугебин чIезе бегьула цонигиял. Байрахъалдаги гIайибал чIвазе ракIалде ккезе бегьула. ГIайибалги чIван, гIодорегIан гьаризе бегьуларо республикаялъул гIаламатал. Гьединго машгьурав композитор – Ширвани Чаллаев. Дица цIакъ адаб гьабула Расул ХIамзатовасул шигIруялъул. Амма гьал гимналъе гьес хъванин абулел рагIабиги гьесул рукIиналда щаклъи бижулеб буго. Босе мисалалъе, «Къункърабазул» кечI. Гьелда абизе бегьула рагъдаса руссинчIел киналго васазул гимнилан. Халкъазда гьоркьосеб гимнлъун гьабизецин бегьула гьеб. ГьабсагIаталда гимн хисиялъе кинабгIаги гIилла букIинчIо. Чед бугони, кечIги букIунин абула. Гьединлъидал дагIбаги тун, гьаб кризисалъул заманалда экономика цебехун туркIизабизе къеркьезе ккола».

Хварав чиясде гьабураб магIу абун, Ширвани Чаллаевасда гIайиб чIвазе къваригIун кьураб къимат букIинчIин жинца гьебилан жаваб кьуна парламенталда кIалъалаго республикаялъул бетIер Рамазан ГIабдулатIиповас. Щванщинаб бакIалда гIадамаз гимналда тIасан рахъулел рукIарал гIарзазул хIасил букIанила гьеб. Живго Чаллаев жиндие рокьулел композиторазул цояв кколила. Гьес хъварал музыкалиял асаралги росун, жидер кIиясго улка сверанила цо заманалда.

Рамазан ГIабдулатIипов: «Нилъеца гимн цо хасав чиясдайищ хурхинабизе кколеб, яги гимн тIолабго Дагъистаналда хурхарабищ букIине кколеб? Дида ракIалда буго Россиялъул гимн хисиялда тIад хIалтIулелъул президент Путинидеги абунщинаб жо. Сталинил заманалда букIараб коммунистазул гимн тIадбуссинабизе къваригIун бугин гьесиеян. Путинида гIезегIан лъикI бичIчIулеб батана Россиялъул халкъалъе хIажатаб гимн. 1940 абилел соназда нилъер улкаялда букIараб халкъалъул унтиги, бичIчIиги жанибе бачараб гимн тIаса бищана гьес. Гьединлъидал жакъа къоялда дунялалда бищун лъикIаб гимнлъун рикIкIуна Россиялъул гимнги. Композиторал хIисабалда Глинкайищ лъикIав вугев, Александровищ, ялъуни Кажлаевищ къуватав вугев Чаллаевищ йилан суал лъезе бегьуларо. Дагъистаналда руго гIемерал мугIрул. Амма руго бищунго кIудиялги. Гьединго буго кIудияб кIиго борхалъи – Мурад Кажлаевги Расул ХIамзатовги. Дунялалдаго машгьурал гьелги жалго тун, цогидал мугIрул ралагьизе лъугьани, нилъ гIадамазда ричIчIизе гьечIо».

ПалхIасил, Дагъистаналъе къваригIун букIанин Россиялда гуребги, дунялалдаго нилъ лъалеб гимнилан тIаде жубана Рамазан ГIабдулатIиповас.

Гьединго цIияб гимн цIунун кIалъазе рахъарал депутаталги рукIана. Гьезул цояс абуна доб гъоркь букIараб гимнги квешаб букIинчIин, амма доб букIанин 1990 абилел соназда рекъараб гимн. Гьанже заман щванин гьел 90 абилел сонал кIочене.

XS
SM
MD
LG