Радал 24-леб декабралда Хасавюрт мухъалъул Байрам росу сверухъ ккуна къуваталъул идарабазул хIалтIухъабаз. РосдалчагIазда гьез абун буго оперативиял тадбирал гьарулел ругин, изну гьечIого яргъид гIуцIаралгун бухьенал ругел ралагьулел ругин. Ордерал яги цогидал документал рихьизаричIого полициялъулаз чIухь бан буго росдалчагIазул минабазда.
Байрамалдаса Амирхан ГIазизовас бицана «Эркенлъиялъе» низам цIунулез чIухь-балеб букIанин бичIчIулареб къагIидаялъ. Гьесул рагIабазда рекъон, минадул щибаб рокъор раккулел рукIинчIо низам цIунулел, цо-цо минабазул азбаралдеги рачIун нахъеги унел рукIана. Гьес абухъе, рохьилазул кумекчагIи цIехолел рукIун ратани, щай мухIканго чIухь бачIеб жиб-жиб минаялъуб. «Галочкаялъе гьабулеб тадбирлъун бихьана полициялъул хIалтIи», - илан абуна ГIазизовас.
Амма гьел тадбиразул хIасилал рукIана: низам цIунулез цадахъ вачун ана росдалчи МухIамад Сулаев. Цебе чанги нухалда ккун вукIана гьев полициялъулаз ва гьесул гIарзаби рукIана, жиндир гIайиб сундулъниги батани, жиндие тамихI гьабеян, батичIони - живги жиндир хъазанги парахатго теян. 2012-леб соналда къуваталъулаз гьев ккурав мехалда, гьес лъазабулеб букIана жиндие гIакъубаби кьолел ругин полициялъул хIалтIухъабаз ва жинца гьаричIел такъсиразе мукIурлъизе тIамулев вугин.
Сулаевасул чIужу ПатIиматI МухIамадовалъ инсанасул ихтиярал цIунулезухъе битIараб гIарзаялда рекъон, 24-леб декабралда радал сагIат анкьго туIбараб мехалъ къуваталъулаз сверухъ ккун буго гьезул мина. «Рагъулаб техникаялда рачIана низам цIунулел. Хъизаналъул хважаин гьеб мехалда рокъов вукIинчо, рогьалил какдаса мажгиталдаса жеги тIадвусинчIо. Низам цIунулез чIухь бана минаялъуб, амма къануналъ гьукъараб щибго жо батичIо гьезие», - илан бицана МухIамадовалъ. Гьелъ гьединго тIаде жубана, чIухь баялъул протокол полициялъулаз кьечIин жиндихъе.
Мажгиталдаса вачIунаго нухда ккун вуго къуваталъулаз Сулаев. ХъахIаб джипалде рекIинавунин гьевилан, абулеб буго Сулаевгун цадахъ рукIарал росдалчагIаз. Ккурасул гIагарлъиялдаса чагIи ун руго Хасавюрталде ва жанисел ишазул министерлъиялъул мухъалда бугеб идараялде раккун руго. Гьениб гьезда абун буго, Сулаев фамилия бугев чи жидехъ гьечIилан. Сулаевасул чIужуялъ гьебго къоялда гIарза кьуна прокуратураялде, жиндир рос вугеб бакIги щай гьев ккуравги лъазабеян.
Хадуй гьей ун йиго адвокат Сапият МухIамадовалъухъе. Цересел нухазда Сулаев полициялде ккейдал МухIамадовалъ цIунулел рукIана гьесул ихтиярал. Адвокат МухIамадовалъ бицаралда рекъон, 24-леб декабралда гьей ункъго нухалда щвана прокуратураялдеги, МВДялъул идараялдеги. Гьелъул гIарзаби тIоцере къабул гьарулел рукIинчIо низам цIунулез, амма гьей республикаялъул прокуратураялде кIалъан хадуб гIарзаби хIисабалде росана.
Жиндирго каналаздаса МухIамадовалъ лъазабун буго, Сулаев Хасавюрт мухъалъул МВДялъул идараялда вугеблъи. Гьение гьей ячIараб мехалда, гьелда абун буго Сулаевас бицанин, жиндир ихтиярал цIунулей гьечIин МухIамадоваилан. Адвокаталъ абуна «Эркенлъиялъе» Сулаев ва гьесул гIагарлъиялдаса чагIи хIинкъизарун ратилин низам цIунулез.
Сапият МухIамадова: «РакIчIун абизе кIола, адвокаталдаса инкар гьабизе гьев тIамунин. Гьев чанги нухалда ккун вукIана цеве, амма кидаго гьесул ихтиярал дица цIунулаан. Гъоркьисала гьев ккурав мехалда, полициялда гьесие гIакъубаби кьуна ва хадуб дица видео бахъана гьевгун. Видеоялда гьес абулеб буго, щиб кканиги, щиб жинца хадуб абуниги, жиндир адвокат йигин Сапият МухIамадова. Гьесул чIужу дихъе ячIана, щайгурелъул гьес гьелъухъе дир номер кьун букIана, живгун щиб-букIаниги кканиги, дихъе ахIеян.
ЧIужуялъги чIванкъотIун гьанже абулеб гьечIо, щай Сулаевас инкар гьабулеб бугеб дидасан. РакIалде кколеб буго, Сулаевасе ва гьесул гIагарлъиялда чагIазе хIинкъаби кьун ратилин. Низам цIунулез жидерго хIалтIул статистика лъикIлъизабизе ккуравлъун рикIкIуна дица Сулаев. Дун адвокатлъун ячугеян гьесда ургъунго абун батила низам цIунулез. Гьесие тамихI къвакIараб гьабиларин рагIи кьун батилаха. Лъаларо, щиб гьезда ракIалда бугеб, амма дихъе буго Сулаевасул видео ва гьес абулеб буго дун гурони, цогидав адвокат кIваричIин».
Хасавюрт мухъалъул МВДялъул идараялда «Эркенлъиялъе» абуна Сулаевасда хурхун рагьун бугин такъсир гьабиялъул иш. Гьеб иш бачунев цIех-рехчи Арслан Булатовас баян кьечIо, амма мухIкан гьабуна Уголовияб Кодексалъул 208-леб бутIаялдалъун рагьун бугин ишилан ва Сулаевасда гIунтIизабулеб гIайиблъун кколин рохьилазе кумекчилъи.
