МахIачхъалаялъул футболалъул клуб «Анжи» Россиялъул премьер-лигаялдаса къватIибе анани, клубалъул стадион «Анжи-Арена» бугеб бакIалда аквапарк базе рагIулин абураб хабар къватIибе баккун букIана гьал къоязда. Амма клубалъул нухмалъиялъги, гьединго «Анжи-Аренаялъул» нухмалъиялъги гьеб хабар гьереси бугилан лъазабуна. Аквапарк хIакъикъаталдаги базе бугин, амма гьеб базе бугин стадионги биххизабун гуреб, гьелда аскIобилан абулеб буго гьез.
Россиялъул футболалъул тIадегIанаб лигаялдаса къватIибе «Анжи» анани клубалъул официалияб стадион Анжи-Арена бугеб бакIалда аквапарк базе рагIулин абураб хабарал тIиритIина 21 марталда, Москваялъул «Спартак» командаялдасаги къун турниралъул сияхIалъул бищун ахирисеб сияхIалде МахIачхъалаялъул клуб ккарабго.
«Наш футбол» абураб телеканалалда спортивияв комментатор Нобель Арустумяница абунин гьединилан хъвалеб буго интернет сайтаз. Клубалъул хважаин Сулейман Керимовасда ракIалда рагIулин гьедин гьабизе. Анжи-Ареналдаса икъбал битIулеб гьечIин клубалъеян абулеб буго гьениб. Гьебго баян тасдикъ гьабун рагIулин Анжиялъул цеве вукIарав бетIерав тренер ХIажи ХIажиевасги.
Амма «Анжиялъул» нухмалъиялъ жидерго сайталда официалияб лъазаби гьабуна гьеб хабар уяб гьечIилан. Ниж щвана Анжи-Арена стадион бугеб бакIалде. Стадионалъул нухмалъулев хIалтIул сапаралъ Москваялда вугин абуна гьенир ратарал хIалтIухъабаз. Анжиялъул нухмалъиялъго гIадин гьеб хабар гьереси бугилан абуна гьезги.
Аквапарк базе бугин гьаниб хIакъикъаталдаги, амма гьеб базе бугин стадионги нахъе биххизабун гуреб, гьелда аскIоб дагьаб добегIанилан бицана стадионалъул бетIерав инженерас. Жиндирго цIар эфиралда рехсезе гьесизе бокьичIо.
Анжи-Аренаялъул хIалтIухъан: «Нижеца балеб буго гьитIинаб аквапарк лъималазул майдан букIараб бакIалда ва ракIалда буго риидалиде гьеб лъугIизабизе. Гьеб аквапарк баялъул хабарги жеги хасалого хIисабалде босараб жо букIана, Анжи премьер-лигаялда хутIи-хутIунгутIиялда бараб жоги гьелъул букIинчIо. Аквапарк баялъул марад буго гьелдаса стадионалъе хайир щвезе букIиналда бараб.
Нижеца гIемерал харжал гьаризе ккола, гьединлъидал тIаде бачIунеб хайирги хIажатаб буго. Стадионги биххизе гьабун аквапарк базе бугилан абурал харбал тIиритIизарулел чагIи бокьарал рукIине рес буго, киназулго кIал къазабун бажаруларелъул. Амма «Анжи» премьер-лигаялдаса къватIибе борчIаниги стадион цебе букIарабго хIалалъ хIалтIизе буго. Амма нижер хьул буго «Анжи» тIадегIанаб лигаялда хутIилилан».
Нусго миллионалдасаги цIикIкIун гIарацги тIад харж гьабун бараб стадионалъул аквапарк гьабизе кканин хIажалъулин гьедигIанго гIарац. Гьебгощинаб гIарацги харж гьабун аквапарк базе букIин щакаб хIалтIи бугилан абулеб бугоан стадион цIунун гьенир хIалтIулел гIолохъабазги.
Анжи-Аренаялъул бакIалда аквапарк базе букIиналда цадахъго бицунеб букIана нагагь премьер-лигаялдаса къватIибе борчIани тIокIаб клуб хьихьизе ракIалда рагIуларин Сулейман Керимовасдаян. БукIине рес бугеб жо бугищ гьеб ва кинал ресал ругел Анжиялъул футболаллъул тIадегIанаб лигаялда хутIизеян абураб суалалда тIасан жиндирго пикраби «Эркенлъи» радиоялъе загьир гьарулел руго футболалъул эксперт ва журналист Тимиркъаев Ильясица.
Ильяс Тимиркъаев: «Гьединаб бечIараб щибниги нур гьечIеб хIайгун Анжиялъул щибниги рес гьечIо футболалъул ТIадегIанаб лигаялда хутIизе. Гьелъул ахирисел хIаязухъ балагьидал щибниги цо гьабилан абураб жо бихьулеб гьечIо гьенир хутIизе гьез гьабулеб. Клубалъул фанатазулги гъира ссунеб, къо бахъанагIан ракIбуссунеб буго гьелдаса, гьез гьеб бахчулебги гьечIо.
Гьелдаго цадахъ захIмат буго абизе щиб ракIалда бугеб клубалъул хважаин Сулейман Керимовасдаяли, хьихьизе бугищ гьес клуб гьечIищали. Гьес инкар гьабунигицин гьадинаб кризисалъул заманалда клуб тIаде босулев чиги щив вукIиневали лъаларо. Республикаялъухъе гьеб кьуни гьезул гьелъие гIарац букIине гьечIо. Премьер-Лигаялде гьеб тIадбуссинабизе гьезул къуват гьечIо дида бичIчIулеб бакIалдаса гIебеде.
Дида ккола гIагараб щуго соналда жаниб «Анжи» букIине бугин футболалъул тIоцебесеб дивизионалъул гьоркьосеб кьердаян. ХIатта премьер-лигаялде нахъбуссинеян абураб масъалаги цебелъечIого хутIилин гьеб гьенибилан кколеб буго дида».
Цогидал чагIаз бицунеб хабаралда рекъон Россиялъул футболалъул премьер-лигаялда хутIизе ккани «Анжи» бергьине ккола гьалдаса хадур рукIине ругел микьабго хIаялда Амма гьеб сурат хIакъикъаталде сверилин абураб жоялда щивниги божулев гьечIо.
