МагъчIваялъе рес

Абхазиялъул тахшагьар Сухумиялда бараб цIияб стадионалда тIобитIана пачалихъияб байрамалда релъараб тадбир. 28 маялда гьениб байбихьулеб буго футболалъул турнир.

Добго къоялъ, 28 маялда, тIобитIизехъин буго УЕФАялъул чемпионазул Лигаялъул финалияб матч. Гьелъухъ миллион-миллион чияс телевидениялдалъун хал-щал гьабизе буго. Амма Абхазиялъул тахшагьаралда букIине буго жиндирго турнир.

Сомалиленд, Сампи, Райетия ва Чагос чIинкIиллъиялъул командаби рачIун руго гьенир. Гьал рехсарал спортивиял къукъаби ккола Цолъарал Миллатазул ГIуцIиялъ къабул гьаричIел улкабазул спертсменаздаса гIуцIарал. Гьеб турниралъе квербакъи гьабулеб буго Conifa абулеб футболалъул ассоциациялъ.

Гьелде гъорлъе унел руго къабул гьаричIел улкаби, ва дагIбадул территорияби. Масала Магърибалъул Армения, Шималияб Кипр, Пенджаб ва цогидал. Гьелдалъун гьел улкабазул церехъабазе бокьилаан дунялалде жидерго кIодолъи ва кIвар бихьизабизе.

Сухумиялда бараб цIияб стадионалда рохалилаб тадбир рагьана Абхазиялъул премьер-министр Артур Миквабияца. «Гьеб буго кIиабилеб халкъаздагьоркьосеб спортивияб къец. ТIоцебесеб букIана - домино хIаялъул», - ян абуна гьес.

Гьеб турнир букIана 2011 соналъул октябрь моцIалда. ГIуцIарухъабаз лъикIалан кIодо гьабун букIана доб турнир. Гьанже абхазазул хьул буго Conifa ассоцияциялъ рехсараб футболалъул турнир жеги рохалилаб къагIидаялда тIобитIиялда.

Гъоркьисала букIараб Conifaялъул турниралда бергьана Шималияб Италиялда ругел сепаратистазул команда. Ассоцияциялъул бетIер, Швециялда бугеб саамал абулеб миллияб къукъаялъул вакил Андерс Блиндица абулеб буго гьеб бугин ракълилаб проект.

Амма жибго Сухумиялда тIад балагьани, рекъел абулеб рагIи захIматго буго билълъанхъизабизе рагъда биххараб шагьаралда бан. 25 соналда жаниб гьенир халат халат рахъулаан рагъулал ишал. Гьенир гьанжеги хутIулел руго Россиялъул аскариял. Абхазия жибго жиндаго чIараб улкалъун кIиго-лъабго гьитIинаб пачалихъалъ ва Россиялъ гурони, тIокIал улкаби къабул гьабичIо.

ЦIияб стадион бан буго советияб заманалда букIараб «Динамо» стадионалда. ЛъабазаргогIан бакI буго гьениб. Миквабияца абуна, гьеб стадион баялъе лъабго бащадгун миллион доллар хвезабун буго.

Турнир байбихьизегIан стадионалда чанго къоялъ анцI-анцI кьурдухъанас репетиция гьабулеб букIана. Гьез рохалилаб церемониялда хвалчабигун кодор рассандизе руго. Гьезул цояв – Ражден Гергаваца абулеб буго, жив цIакъ чIухIарав вугин жиндирго ватIаналъе гьадинаб хъулухъ гьабизе жиндие рес щун букIиналдаса.

Спортивияв комментатор Алтгур Гунгбаца абулеб буго – аслияб масъалалъун кколин чемпионат кIудияб чIухIигун тIобитIизе. Жидее бокьун бугин унго-унгояб байрам.

Гунгбал анищ – Абхазия – ФИФАялде гъорлъе лъугьин. Жиндир ватIаналъул лъидаго бачIеблъи чIахIияб Россиялъ къабул гьабунин, гьединлъидал, хьул лъезе бегьулин ахир-къад гьадин букIиналда.

Абхазиялъул буго жиндирго байрахъ, жиндирго герб, нимн, экономика, мацI, маданият ва тарих, - ян абуна Гунгбаца ва мисалалъе бачана 111 улкаялъ къабул гьабураб Косово.

Гьеб улка 2008 соналда лъугьана ФИФА-ялде. Абхазиялъул футболалъул командаялъул тренер Джума Кварацхелияца абулеб буго, жидерго лъималаздаги гьеб бихьилин.

Абхазиялъул Футболалъул Федерациялъ гIарз битIанин гьеб кIиябго гIуцIиялде, аммаила, гьеб гьари нахъ чIван бугин, щай гурелъул ФИФАялъги, УЕФАялъги Абхазия рикIкIула Гуржистаналъул Футболалъул ассоциациялъул бутIалъун.

XS
SM
MD
LG