Оппозицияб Лейбористазул партиялдаса кандидат бусурбанчи Садикъ Хан Британиялда тIоцебесеб нухалда вищун вуго Лондоналъул мэрасул хъулухъалде. Гьесие кьун буго рищарухъабазул гьаркьазул 57 процент, гьесул кокурент консервативияб партиялдаса Зак Голдсмитие – 43 процент.
Бергьенлъи Ханида баркана Лейбористазул партиялъул бетIера Джереми Корбиница. Гьесда гьединго баркана Парижалъул ва Нью-Йоркалъул мэрал Анн Идальгоца ва Билл де Блазиоца.
45 сон барав Хан ккола Пакистаналдаса иммигрантазул вас. Гьесул эмен вукIун вуго автобусалъул шофер.
41 сон барав Голдсмит кколев рагIула Британиялъул аристократазул бечедаб хъизаналдаса чи.
Лондоналъул мэр вищула 4 соналъе ва гьеб хъулухъалда вукIиналъул болжалазе гIорхъаби чIезарун гьечIо.