Экономикияб такъсир гьабиялъул гIайибги гIунтIизабун, туснахъалда лъурай Азербайджаналдаса Эркенлъи радиоялъул журналист Хадиджа ИсмагIиловалъе бихьизабун буго «ЗахIматал шартIазда эркенаб прессаялъе гьабураб хъулухъалъухъ» абураб ЮНЕСКОялъул Гиермо Канол премия.
Премиялъе гьединаб цIар кьун буго 1986 соналда Боготаялда чIварав Колумбиялъул El Espectador абураб газетаялъул журналист кIодо гьавун.
Халкъаздагьоркьосел гIуцIиязул пикруялда, ИсмагIилова жание гъун йиго, гьелъ Азербайджаналъул талъиялъул коррупциялъул хIужаби къватIир чIвазари сабаблъун.