МагъчIваялъе рес

ГIолилазул коммандаялдаса Анжиялъул аслияб коммандаялде хIазе рес щвезе ккани гьеб гIарац кьечIого жо кколароанила, гьеб кьезе инкар гьабуни киданиги аслияб къокъаялда цадахъ хIазе ресги щолароанила.

Гьеб талавурчилъи Анжиялъул тренерлъун Гус Хидинг вачIараб мехалда лъугIизе танила, гьес жив лъиениги гIарац кьечIониги лъикIаб хIай бихьизабун хадуб гьадинго аслияб къокъаялде гъорлъе вачанилан.

Гьенив хIан жидеца кIиго бергьенлъи тIа-тIалаго босун хадуб, цIакъ лъикIаб гонорар щун букIанила жиндие. Гьеб щвараб 60 азарго евроялда тIасаги магъало бахъизейилан Агъаларов лъугьараб мехалда жиндица гьеб гIарац кьезе инкар гьабунила. Гьеб мехалда , бихьилан духъиланги абун кIал гьикъанила жиндида гьесилан лъазабулеб буго Шарифица.

Гьесул рагIабазда рекъон Хидингги нахъе ун гьесул бакIалда тренерлъун ХIажи ХIажиев вачIун хадуб гьев Агъаларовасул гьудул вукIиналъ Шарифидаса рецIел босизегIадин гьев Анжиялъул аслияб къокъаялдаса нахъе реххун вуго.

Сулейман Керимовасул мугъзада нахъа гьединал хIалихьатал жал гьарулел рукIиналъ ццин бахъун бугин жиндир, некIого гьесда кинабго жо бицинчIолъиялдаса ракI бухIун вугин абулеб буго анжиялъул экс-футболистас.

«Эркенлъи» радиоялъухъе кIалъазе щвечIо Агъларов Руслан, амма гьес Матч.тв каналъе кьураб баяналда лъазабулеб буго Шарифихъа жиндиего гIарац киданиги босичIила жинцайилан. Гьесул рагIабазда рекъон гIолилазул командаялдаса цо чи Анжиялъул аслияб коммандаялъе къваригIани хIазе виччазе вукIине резервалда вукIине кколев вукIун вуго. Гьел резервалда ругезеги аслияб командаялда хIалезего гIадаб гIарацги щолеб букIун буго.

ГIолилазул командаялда лъикIаб хIай бихьизабурал футболистал иргаялда ритIулел рукIун руго гьенире. Гьединлъидал кутакаб бажариялдалъун гурел, иргадал аслияб коммандаялде хIазе унел ругелъул, гьезие щвараб гIарцул 30 процент гIолилазул коммандаялъул цойгидал футболистазеги гьезул массажистазеги, тохтурзабазеги кьезе къотIи гьабун букIун буго.

Гьезул цIакъго дагьал харжал рукIун руго доб мехалда. Жиндие гьел футболистаз щибниги гIарац кьолароанилан лъазабун буго Агъаларовас.

Спортивияв журналист Айдемир Дагъановасул пикруялда рекъон гIолилазул командаялда ругел футболистазе кумекалъе босулеб букIун батани гьеб аслияб командаялъул резервалда ругел футболистазухъа гIарац гьеб бегьулареб иш гьечIо. Амма гьел футболистазул ургъелалдаса цIикIкIун жидерго ургъел гьабулеб букIун батилин гьев Агъаларовас ва ХIажиевасилан рикIкIунеб буго гьес.

Айдемир Дагъанов: «Агъаларовги ХIажиевги лъалаго, хасго ХIажиев гьев Агъаларов цIунизе лъугьараб куцги хIисабалде босун абизе бегьула гьезие гьел футболистазухъан щолеб бутIа букIун бугилан. Хасго гьениб дагьаб гIарац гурелъул букIараб. Чанго анцI азарго евролъидал гьез кьезе кколеб букIун бугеб. Киназго абулеб буго Керимов киве валагьунила вугев, гьеб ишалде гьоркьове щайила гьев лъугьунаревилан.

Керимов Анжиялдеги гьелъул ишаздеги гьаб сагIат регIун гьечIин абизе бегьула, хасго гьесул сахлъиялъул рахъги гIемер лъикI гьечIо, футболалдасаги кIварцIикIкIарал ишазда ватила гьев. Амма гьеб Шарифил лъазабиялъ гьадингоги хIалихъего биххичIого хутIун бугеб Анжиялъул имиджалда цIакъ кIудияб кьаби щвезабуна. Хасго Агъаларов гьанже Анжиялъул аслияв тренерги вугелъул.

Анжиялда гурони цойгидал командабаздаги букIуна тренераз футболистазухъе гIарац бахъулеб къагIида, амма гьелъул хIакъалъулъ бицунев чи вахъунгутIи квеш ккун буго. Цо рахъалъ Шарифие баркала кьезе ккола. Агъаларовасе щибниги тамихI гьабилин кколаро дида.

Сахаб пачалихъ букIарабани нилъер гьеб ахIи-хIуралдаса хадуб халкъалъ бетIер тIаде босулареб хIал гьабулаан гьесул, хIалтIудаса нахъеги реххун тIад такъсиргьабиялъул ишги рагьулаан, амм нилъер сахаб пачалихъ гьечIелъулха».

Анжиялъул фанатазул «Дикая Дивизия» багъа-бачариялъул бетIер Гъазиев Рамазаница рикIкIунеб буго гьаб сагIат Руслан Агъаларовасде данде гьеб иш гьев тренерлъиялдаса нахъе инавизе къваригIарал гIадамаз багъаризабун бугилан.

Гъазиев Рамазан: «МухIамад Шариф кидаго Анжиялъул аслияб командаялда хIазе гIадав кутакав футболист вукIинчIо. Гьединлъидал дида лъалеб бакIалдаса гIебеде тренерасдаги гьесдаги гIолилазул командаялдаги гьоркьоб къотIи гьабун букIана аслияб командаялде резервалда тезе гьев вихьизавилин, гьенив таралъухъ гьес гонорар бикьизе бугин цойгидал гIолохъанал футболистазда гьоркьобилан.

МухIканго чан процент гьес кьолеб букIарабали дида лъаларо. Гьанже гьес кинабго Агъаларовасде реххулеб буго, амма живго гьев Шариф кеп-гIоркьалда вукIине бокьулев чи вукIана.

ХIаялдасаги ихтилаталъул ургъел букIунан гьесие. Агъаларовасе гIоло гуро гьев Анжиялъул аслияб командаялде хIазе вачинчIев, гьесул жиндирго бажари гIечIо. Шафир живго чанцIулго Сулейман Керимовгун дандчIвана. Гьедин гIарацги бихъун гьев къварид гьавулев вукIун ватани щайха гьес цониги нухалъ Керимовасда гьелъул бицинчIеб.

Гьанже Анжиялъул гьадингоги лъикIаб хIал гьечIеб мехалда, тренер гьел гьесде гьарулел ругел гьужумал нахъчIваялъул ургъалида вукIине кколев вуго, хIаялъул ургъел гьабизе заманго толеб гьечIо. Дир пикруялда рекъон Агъаларов тренерлъиялдаса вахъизе къваригIараз вагъазиавуна гьев Шарифги, хас гьабун Руслан гьеб хъулухъалдаса нахъе инабизелъун гьабураб иш буго гьеб».

ГьабсагIат «Анжи» россиялъул премьер-лигаялда ругел командабазул бищун нахъагIадин буго. Щуго матчалда тIа-тIала къуна гьел.

XS
SM
MD
LG