Дагъистаналъул Хасавюрт шагьаралдаса кколев вугониги, ахираб заманалда Сайтиев тIубанго Чачан республикаялъул чилъун лъугьанин ва гьес гьеб республикаялъул мурадал цере кколин рикIкIунеб буго цо-цо экспертаз.
ЛъабцIул Олимпиялъул хIаязул чемпион ва Чачан республикаяъул бетIер Рамзан Къадировасул гIакълучи Бувайсар Сайтиевас Пачалихъияб Думаялде рищиязда гIахьаллъизе кандидатра лъун буго Дагъистаналда бугеб «Единая Россия» партиялъул бутIаялъул рахъалдаса.
Сайтиевас кандидатура Дагъистаналдаса лъейлда бан батIи-батIиял пикраби загьир гьарулел руго экспертаз. Цоязул пикруялда гьев Хасавюрт мухъалда гьавурав ва гIурав дагъистанияв вугониги, кколев вуго чачан миллаталъул чи, гьединлъидал, гьесие Чачан республикаялъул мурадал гIагарал кколел руго.
Гьел экспертаз ракIалде щвезабулеб буго Дагъистаналда ГIавухъ мухъ бахъинабиялъул суал бищун цIакъ борхун багъа-бачари гьабурав чи Сайтиев вукIаравлъи.
ХIакъикъаталдаги квеш ккараб жо бугин, гьединал конфликталъулал ахIвал-хIал гIуцIулел кандидатураби лъезе нухал партияз къотIун гьечIолъи. Цо рахъалъ босанани Сайтиев кколев вугин дагъистанияв, цогидаб рахъалъ гьев вугин тIуван Къадировасул чийин бицана «Эркенлъи» радиоялъе «Новое дело» газеталъул бетIерав редактор ХIажимурад СагIитовас.
Гьесул пикруялда рекъон, Сайтиевас Дагъистаналдаса кандидатура лъей аслияб куцалда хурхараб буго Чачан республикаялъул кIварагIан цIикIкIун вакилзаби Пачалихъияб Думаялда рукIине бокьи гьезул тIалъиялъе.
ХIажимурад СагIитов: «ЩибгIаги лъикIаб жо гьечIо гьелъулъ. ЛъикIаб гьечIо гьев Пачалихъияб Думаялде ворчIаниги, гьечIо лъикIаб ворчIичIогон хутIаниги. РикIкIунаха, депутатаз тIолго халкъалъул интересал цIунунилан, амма нилъеда лъалаха, пуланаб къо тIаде щведал, этникияв чачанас Чачан республикаялъул интересал цIунизе рукIин, Дагъистаналъул цIуничIогон.
ЛъикIаб гьечIо гьев ворчIичIогон хутIаниги, щай гурелъул гьес кандидатура лъеялда бан гIемераб къваригIел гьечIеб хабар жакъа къоялдего буго, гьеб квеш букIунеб буго Дагъистаналда ругел чачанада: щайин, жалги Дагъистаналда гIумру гьабун ругеб заманалда гьанисан жидер чи вукIине бегьуларебин абун.
Квеш ккараб жо буго тIалъиялъ гьединаб конфликталъулаб ахIвал-хIал ккезе толеб букIин. Гьелъул кинаб кканиги хIасил позитивияб букIине рес гьечIего. БачIиндаго къваригIел гьечIеб ахIвал-хIал ккезе толеб буго гьез, гьеб буго дие абизе бокьун».
СагIитовас баян гьабухъе, Пачалихъияб Думаялде букIинесеб созывалда Дагъистаналдаса депутатазе рихьизарурал бакIазул дагьал руго. Цебесеб созывалда Дагъистаналдаса 11 депутат вукIун ватани, букIинесеб созывалда 8 бакI гурого гьечIила. Щай Чачан республикаялъул бетIерасул гIакълучияс Чачан республикаялдаса гуреб, Дагъистаналдаса кандидатура лъолеб бугебин абураб суал бачIунеб бугила, гьелъие бугила гIицIго цо гIила – чачаназе щиб рес батунги Пачалихъияб Думаялда кIварагIан жидерго чагIи цIикIкIун рукIине рокьи.
ХIажимурад СагIитов: «Чачан миллаталъул чагIи кIварагIан циIкIкIун гьенир рукIине бокьиялда бан чачаназда гIайиб гьабизе бегьуларо. Сайтиев ккола цо рахъалъ дагъистаниявги, амма гьес ккараб бакIалда Чачан республикаялъул мурадал цIунизе руго. Гьев чачаназе ккола жидерго чи, гьесие Чачан республикаги ккола жиндир бакI. Чачаназе хIажат буго гьев дагъистанияв кколин абураб жоялда гъоркь гьев рищиязда ворчIизави».
Рищиязда цебе Дагъистаналда кидаго гIадин политикияб гIумру чIаголъун бугин абизе бегьула. Пачалихъияб Думаялде Дагъистаналдаса кандидатура лъурал, гьединго жамгIияталда жанир багъа-башариял лъугьинарурал кандидатал ккана журналистал Юлия Юзик ва Эрика Эвер.
Рищиязул къо гIагарлъанагIан республикаялда ругел политикиял къуватал хисулел ругилан баян гьабуна «Новое дело» газеталъул бетIерав редакторас. ГIадатиял гIадамаз данде ккун квер босуралеб хIалалда тушманлъиялда жакъа ругез, метерисеб къоялда къвалал ралила.
Гьединлъидал, политикиял къуватазул хIал чанго нухалъ хисизе бугила жеги республикаялда. Жакъа цо жо бицунел чагIаз, метерисеб къоялда хисизе бегьулила кинабго, жидеца лъурал шарт1ал данде ругез тIуранани.
Пачалихъияб Думаялде ва Халкъияб мажлисалде рукIине ругел рищиязда цIияб, политикияб къуватлъун гьединго лъугьине рес буго «Народ против кроррупции» абураб багъа-башариялъул вакилзабиги.