Гринписалъулгун гIалхулаб тIабигIат цIуниялъул рахъалъ ТIолгодунялалъул фондалъул бакIалда «Экологиялъулаб Палата» гIуцIана Пачалихъияб Думаялъул экс-депутатаз.
Щайин абуни гьеб кIиябго гIуцIи патриотикияб багъа-бачарилъун букIине кколин ва гьелъ Россиялъул промышленносталъегун, бизнесалъе квал-квал гьабизе бегьуларилан абулеб буго гьез.
Гьединго жакъасеб Россиялда экологиялъулаб патриотизм абураб жо букIине кколин миллияб идеялъе аслулъунилан абураб ракIчIей буго экс-депутатазул. БакътIерхьул пачалихъалда ругел улкабазул экологиялдехун бугеб бербалагьиялде дандчIезе ахIулел руго гьез.
Щайгурелъул гьел улкабазул экологиялдехун бугеб бербалагьи гIуцIун бугин постмодернизмалъулги, антиглобализмалъулги, радикалияб феминизмалъулги, гьединго гIурччинаб анархизмалъулги кьучIалда.
Россиялъул экологиялъул Палатаялъул нухмалъулев Владимир Петровасги абулеб буго гIицIго тIабигIат цIуни гурони, экономика цебетIезабиялъе лъураб масъала бихьулеб гьечIин жакъа къоялъ улкаялда ругел тIабигIат цIуниялъул гIуцIабазулъ.
Гринпис гIуцIиялъул Россиялда бугеб бутIаялъул нухмалъулев Инван Блоковас «Эркенлъи» радиоялъул гIурус хъулухъалъе кьураб баяналда абуна жинда лъаларила «Экологиялъул Палатаялъ» гьединал лъазабиял гьариялъе гIилла кинаб букIарабали.