МагъчIваялъе рес

Терроризмалде дандечIей гьабиялъул хIалтIи игIланал чIваялде сверун буго


Сергей Меликов

Шималияб Кавказалъул ТIадегIанал цIалул идарабазда экстремизмалда ва терроризмалда дандечIей гьабиялъул дарс баккизе рес буго гIагараб заманалда. ЦIалул программабзде гьеб дарс жубазе хIажат ккеялъул лъазабуна гьал къояз Сергей Меликовас.

Шималияб Кавказалда Россиялъул президентасул ишал кодосев Сергей Меликовас Шималияб Кавказалда ругел ТIадегIанал цIалул идарабазул ректоралгун букIараб данделъиялда загьир гьабуна пикру, тIадегIанал цIалул идарабазда терроризмалде ва экстремизмалде дандечIей гьабиялъул дарс лъезе хIажат ккун букIиналъул.

Лъай кьеялъул ва тарбия кьеялъул хIалтIул цIиял формаби рахъун, цIалдохъабазе дарсал лъезе хIажат бугин жакъа, гIолеб гIелалда халкъазда гьоркьосел терроралъул гIуцIабазул вербовщиказда дандечIей гьабизе лъазе букIиналъейин лъазабуна Меликовас.

Мисалалъе гьес бачана цебегIан, Москваялъул Пачалихъияб университеталъул студент Варвара Карауловалъул ккараб иш. Гьединго ракIалде щвезабуна Дагъистаналда полициялъул посталда цебегIан ккараб кьвагьи Астраханалъул университеталъул студентас гьабун букIин.

Дагъистан бищун гIолилал гIемераб субъектазул цояб букIиналъ, кIудияб кIвар бугин гьелгун гьабулеб хIалтIулин баян гьабулеб буго Дагъистаналъул пачалихъияб университеталъул социалияб хIалтIулгун тарбия кьеялъул проректор Маликова Мадинаца.

Масала, цIалуде хьвадичIогон чIей, яги цIалуде кIвар кьолеб гьечIолъи кколила тIоцебесеб гIаламат, студентасул эркенаб заман тIобитIиялъулъ хиси ккун букIиналъул ва гьелъ щаклъизе ккелила тIоцеве гьесул курсалъул жавабияв мугIалим, щайгурелъул, студентазул аслияб къадар росабалъа рачIарал рукIиналъ гьезул улбузда гIемерисеб мехалъ щибго жо лъалеб букIунарила.

2014 соналдаса бахъун, Сириялде Дагъистаналдаса Сириялде аразда гъорлъ руго 8 чи студентазул, гьезул аслияб къадар тIадбуссинабизе кIун гьечIо.

Жакъа щибаб школалда, университеталда ва цогидаб идараялда ругила чIван игIланал «Нет терроризму»йилан хъвай-хъвагIаял ругел, амма гьеб букIинчIого букIиналъе гьабулеб хIалтIи щибго гьечIин бицана «Эркенлъи» радиоялъе Дагъистаналъул ГIолилазул ишазул минстерлъиялъул вакил МикагIил МикагIиловас.

Гьес Дагъистаналда гIумруялде бахъинабулеб буго тарбия кьеялъул «Ракълилаб Дагъистан» абураб проект. Жакъа терроризмалдегун экстремизмалде дандечIеялъул хIалтIи формалияб букIаго, гIолилал гьетIараб нухде ккечIого хутIиялдаса цIунарал гьечIилан баян гьабуна гьес «Эркенлъи» радиоялъе.

МикагIил МикагIилов: «Республикаялда ругел батIи-батIиял мухъазде ва шагьаразде 70 батIияб бакIалде сапар бухьана нижеца. Дун вуго гьединаб дарс лъеялъул рахъ ккурав чи. Жакъа колледжазул, университетазул студентал ракIарун, зал цIурал гIолилазда 1999 соналда щибин ккарабин цIехедал, цониги чияс борхуларо квер. Гьеб, дагьаб цебегIан ккараб тарих, террористазул тIадекIанциялъул лъалеб жо гьечIо гIолеб гIелалда».

МикагIилица баян гьабухъе, лъавукъал гIолилал бигьаго кIолел руго батIи-батIиял чвахиязда гъорлъе цIазе ва гьел бигьаго сверулел руго вербовщиказ цIалелъуре.

МикагIил МикагIилов: «Якъинго бичIчIулеб жо буго тарих лъаларел, лъай гьечIел гIолилал бигьаго рачине кIолеб букIин бокьараб жоялда гъорлъе. «Нет экстремизму», Нет терроризму» абурал игIланал чIван, формализмалде сверизабун буго гьеб хIалтIи. Экстремизмалде данде чIеялъул тема гьанже абухъе, ккколеб буго трендалда бугеб тема, грантал росизе рес бугебги. Гьелъ хъвай-хъвагIаял, рагIаби гIемер руго хIалтIи дагь буго».

«Ракълилаб Дагъистан» абураб проекталъул къокъаялъ хIалбихьи гьабурал материалал ругилан тIаде жубана гьес. ГьабсагIаталда, аслияб масъала бугила гьеб дарс кьезе кадрал хIадури.

Гьанибго абизе ккола, Дагъистаналдаса Сириялда «Исламияб пачалихъ» абураб Россиялда гьукъараб гIуцIиялъул рахъалда рагъизе арал чанго тIадегIанал цIалул идарабазул Дагъистаналдаса студентал чIван рукIиналъулги.

Дур пикру

Комментариял рихьизаре

XS
SM
MD
LG