Хамиз къоялъ Гаагаялда бугеб Халкъаздагьоркьосеб Трибуналалъ ритIухъ гьавуна Сербазул радикалияб партиялъул цевехъан Воислав Шешель. Живго Шешелица лъикIаб къимат кьуна диванчагIазе.
Диваналъул данделъиялде вачIинчIого, Шешелица абуна диванчагIи мутIигIлъичIин жидеде гьабулеб политикияб тIадецуялъе ва битIараб хIукму гьабунин.
Гьебго мехалъ Сербиялъулги къватIисел улкбазулги инсанасул ихтиярал цIунулез ва политиказ Гаагаялъул Трибунал какана. Гъозул пикруялда Шешелида тIад бугеб 1990 соназда Босниялъул ва Хорватиялъул бусурбаби чIваялъул гIайибалъул хIакъалъулъ жидеда лъалин ва Шешель гьелъул жавабчилъилдаса эркен гьави данде кколареб иш бугин.
Хорватиялъул премьер-министр Тихомир Орешковичас Гаагаялъул Трибуналалъул хIукмуялда абуна, гьеб бугин сурукъаб хIукму гуребги - диваналъул ва прокуратуроялъул къейги.