Бищун дагь босун 34 чи хун ва 150 чи лъукъун вуго талат къоялда Бельгиялда гьарурал кьвагьиязул хIасилалда, VRT телекомпаниялъул баяназда рекъон.
Завентем абураб Брюсселалъул аэропорталда радал ккуна кIиго кьвагьи. Хун вуго бищун дагь босун 14 чи, лъебергоялдаса цIикIкIун лъукъунги вуго. Гьезда гъорлъ лъимал ругин, лъазабулеб буго RTBF абураб Бельгиялъул телеканалалъ.
Кьвагьиял ккун руго аэропланазда рекIиналда цебе пассажиразул контроль гьабулеб терминалда. Гьезда цебе рагIунеб букIун буго кьвагьдей ва гIараб мацIалда калам.
Дагьалъ хадуб кьвагьиял ккун руго жибго Брюсселалдаги, Евроцолъиялъул институтал ругеб бакIалда аскIобеххун. Гьениб метроялда гьабураб кьвагьиялъул хIасилалда хун бищун дагь босун 20 чи. VRT телекомпаниялъул лъазабиялда рекъон, кьвагьиял гьарун руго хвалде унез.
Брюсселалъул аэропорт къан буго, маххул нухалъул транспорталъул хьвади чIезабун буго. Цо-цо информалатаз лъазабулеб буго, кьвагьиязда хурхен букIиналъул щаклъи букIун ккуразда гъорлъ Дагъистаналда гьавурав Белорусалъул гражданавги вугин. Цогидаз гьеб информация нахъ чIвалеб буго. Информация мухIканлъизабулеб буго
Кьвагьиял ккун руго Брюсселада ункъго къоялъ цебе 130 чиясул гIумру бахъараб теракт ноябралда Парижалда гьабиялъул щаклъи бугев СалахI ГIабделсалам ккун хадуб.