Россиялъул информалатазул цояз гьатIан къоялда лъазабуна Журналистазул ва информалатазул хIалтIухъабазул профессионалияб цолъи гIуцIиялъул хIакъалъулъ. Цолъиялъул гIахьалчагIилъун лъугьунел руго «Медиазонаялъул», РБКаялъул, «Новая газетаялъул», «Слоналъул» ва цогидал СМИязул хIалтIухъаби.
Профессионалияб цолъиялъул уставалда рекъон, хIукму къабул гьабиялъе гIолеб буго гьаркьазул аслияб къадар. ГIуцIиялде лъугьиналъе гIолеб буго гьелъул гIахьалчагIазул кIигоясул рекомендация.
Профессионалияб цолъи гIуцIана Гъалгъазул республикаялда Чачан республикаялъулгун гIорхъода аскIоб 9 марталда журналистаздеги инсанасул ихтиярал цIунулездеги гьабураб тIадекIанцIи гьабун хадуб. Жал щалали лъаларез рухана журналистал ва бухIана гьел раччун букIараб микроавтобус. Бищунго квеш вухун вуго гьелъул бетIергьан Башир Плиев.
Ахирисесе цIияб автобус босиялъеги гьесул сахлъи рукIалиде буссинабиялъул мурадалда Москваялда тIобитIизе кколеб букIана рахIму-цIобалъул концерт. Амма минаялда жаниб кьвагьи ккеялъул хIинкъи бугинги абун, Москваялъул полициялъ гьеб тIобитIизе гьукъана.