Муцалаулалдаса щварал баяназда рекъон, низам цIунулез сверун ккун букIун буго тIоцебесеб школалъул сверухълъи. Гьез чIухь бан буго гьениб аскIоб бугеб рехун тараб минаялъуб.
Гьедин бицана гьеб росулъа ГIайшатица.
ГIайшат: «Гьенир жанир лъабгоял ккун ругин, яргъил нахърателги батанин бицунеб бугоха. Гьениб аскIоб бугеб школаги сверун ккун букIун буго чиясе къварилъи ккеларедухъ. Доб мина абуни ккола эбел-эменги хун цояв вацасе щвараб мина. Гьев гьенив жанив вукIинчIо гIумру гьабун. Гьединлъидал жидерго мурадазе гIоло пайда босун буго гьеб минаялдаса».
17 марталда Муцалауалалдаса рачун арал гIолохъабазул цоясул эбелалъулгун гара-чIвари гьабуна ЭР-ялъ. Ккун арав жиндир вас нахъвуссинегIан, жиндирги гьесулги цIарал рицинчIого теян гьарана гьелъ. Амма Сириялда рагъулездехун щибгIаги бухьен гьечIин гьесулиланги тIадежубана эбелалъ.
Эбел: «Вас кив вугевали бицунеб гьечIо нижеда. ТIубараб къо ана жакъа гьев валагьулаго. Кивниги гьечIо – я Хасавюрталда, яги МахIачхъалаялда (туснахъалда – ЭР). Гьанже цIех-рехалде кьезе вуго нижеца гьев».
ЭР: «Интернеталда хъвалеб буго Сириялда рагъулездехун хурхен букIанин нужер васасулилан».
Эбел: «Кинаб Сирияги, хурхенги букIунеб?! Гьадингосеб чIанда буго гьеб. Дир вас МахIачхъалаялда нартилгун газил гIелмуялъе цIалулев вуго, гьединго хьитал гьарулеб бакIалда хIалтIулевги вуго».
Сириялда рагъулел россиялъулазул къадар Дагъистаналдаса бугин рикIкIуна низам цIунулез. Руго дагъистаниял дораса тIадруссун рачIаралги. Масала, гьедин вачIунаго гъоркьисала Краснодаралъул аэропорталда ккуна ФСБ-ялъ Дагъистаналдаса ГIали Гъазиев. 16 марталда Шималияб Кавказалъул рагъулаб диваналъ туснахъалъул микьго сон къотIана гьесие.
17 марталда Россиялъул Федерациялъул Шураялда букIана Сириялде рагъизе унезул бицунеб данделъи. Жанисел ишазул министерлъиялдаса вакил Владимир Макаровас абуна 3 417 чи ун вугин Россиялдаса Сириялдеги ГIиракъалдеги. Гьезда гьоркьов рагIула дагьалъ цеве ислам босарав 200 чиги.