7 марталдаса нахъе Дагъистаналда виларав Венгриялдаса экстремалияв турист Торок Петер Жолт валагьизе республикаялъул официалиял идарабаз жеги байбихьун гьечIо, амма гьеб хIалтIи тIаде босун буго гIолилазул жамгIиял гIуцIабаз ва волонтераз. 9 марталдаса нахъе гIолилал ун руго гьесул маршруталда хадур Сулахъ гIор ккун эхере, амма гьев живго жеги ватун гьечIо.
Амма гьесул лъалкIал ратун руго гIуруда аскIор. ТIоцеве гьев МахIачхъалаялда дандчIварав ва гьениве нухарегIарав ГьиматхIажиев Тимурил рагIабазда рекъон, гьев чIаго ватизе шансал цIикIкIарал руго. Турист цевеккунги гьедин вилулаан.
ГьиматхIажиев Тимур: «Нижер къокъаялъ халгьабуна гIадамас хIетIе чезе рес бугеб щинаб бакIалда, щибниги батичIо. Амма цоги къокъаялда гIурул рагIалда ратун руго лъалкIал.
Гьениб гIорги бехе бортун, хIарщудаса ине бегьулеб хIал буго, гьенисан гIурумухъ ккун гъоркье араб къагIида гьев. Ниж абуни ЧIикIаб хIорихъ щвезегIан ана, батичIо щибниги. ГьабсагIаталда нижер къокъаялъ ва бакIалъулал гIадамаз расаялдаги рекIун гIурухъ эхере ун руго. Амма гьев гIоралъ восун гъанкъун вукIун ватани, гьелгощинал къоязда жанив гьев вихьизе кколаан.
Ялъуни гьев цо кинабалиго нохъода ватила, яги хIетIе бекун, цоги жагъаллъи ккун ватила. Рес буго гьев жиндирго маршрутги тун цоги бакIалде ине, щайгурелъул гьеб бакI гIажаибго берцинаб бакI буго. Гьесги дида абун букIана жиндие бокьун бугин тIабигIат бихьизе, гьелъул суратал рахъизе. Хьул буго гьедин ун ватиялда, щайгурелъул, гьесул цее йикIарай чIужуялъги абуна, гьев цевеккунги гьедин вилун вукIанин чанцIулго. Гьев бокьараб заманалда бокьараб бакIалдаса ваккун вачIине бегьула».
Официалиял идарабазда турист балагьизе байбихьун гьечIо унго-унгояб хIалалъ. Дагъистаналъул жанисел ишазул министерлъиялда «Эркенлъи» радиоялъе абуна, турист валагьулев вугевлъи лъазабун бугин киса-кибего полициялъул бутIабазде, киназго ахIвал-хIалалда хадуб хал ккун бугин.
Гьев вилун вугилан абураб гIарза жидехъе щвечIониги, социалиял гьиназда тIибитIараб информациялда рекъон жидеца гьабизе кколеб хIалтIи гьабулеб бугин. Дагъистаналъул ГIорхъолъа рорчIарал ахIвал-хIалазул министерлъиялда абуна, кинабго хIадурун бугин, амма жидее къваригIун бугин гьев чара-гьечIого валагьизе ккараб хIал бугилан абунаб баян къуваталъул идарабазухъа.
Венгриялъул Россиялда бугеб консульствоялдаги гьев валагьиялда хурхун кинабгIаги баян гьечIилан хъвалеб буго Уткина Аннаца. Россиялъул ГIорхъолъа рорчIарал ахIвал-хIалазул министерлъиялде гьез баянал кьун гьечIо. Гьединлъидал, виларав турист валагьулев вуго жалго гIадамаз.
РакIалде щвезабилин, турист вилун вуго 7 абилеб марталда. Дагъистаналде гьев щун вуго 5 марталда ва 9 марталда тIадвуссун Москвалде ине кколаан. Амма Москваялде гьев воржун гьечIо, телефоналъ жавабги кьолеб гьечIо.
Гьесул йикIарай чIужу Уткина Аннаца Фейсбукалда хъвалеб буго, гьев цевеккунги вилун вукIанин Америкаялда, амма живго ваккун вачIанин хадувккун. Дагъистаналда гьесул интерес букIун буго Сулахъ гIурумухъ ккун бугеб тIабигIат лъабазиялде.
Хадув гьев ине кколев вукIун вуго МахIачхъалаялда аскIоб бугеб Сары-Кум абураб салул магIарде ва Калмыкиялде. Москваялда гьесда цадахъ цIалун вукIарав АхIмад Расуловас хъвалеб буго «Новое дело» газеталъул форумалда, гьев турист гурин, профессионалияв зоолог вугин, ва гьедин чанго анкьалъ тIабигIат лъазабулаго вахчун чIей гьесие хасиятаб бугин.