Рузманалда хадуб Назраналда Насыр-Корталъул мажгиталда аскIоб кьвагьизабуна автомобиль. Лъазабиязда рекъон, зарал ккун буго лъабго чиясе, гьел азарханаялда лъун руго.
Зарал ккун буго гьединго аскIореххун рукIарал цогидал автомобилазеги, мадугьалихъ ругел рукъзазул гордабазул цIерал гъурун руго.
Низам цIунулезул версиялда рекъон, гьеб букIине бегьула имам ХIамзат Чумаков чIвазе гьабураб хIалбихьи. Кьвагьиялъул хIасилалда гьев дагьалъго лъукъун вуго. Лъазабулеб буго, гьеб кьвагьи кканин, имам къватIиве вахъарабгойин.
БатIия-батIиял лъазабиязда рекъон, кьвагьиялъул къуват дандбалеб буго тротилалъул щуго-анцIго килограммалъул кьвагьиялда.