«Превентивияб ритIухълъиялъул ядерияб кьаби» щвезабиялъул хIинкъиял кьолел руго Шималияб Кореялъ Цолъарал Штатазе ва Жанубияб Кореялъе. Пхеньян гьединаб галиялде гьесизабун буго байбихьулел Key Resolve ва Foal Eagle абурал Вашингтоналъулги Сеулалъулги цадахъалъ рагъулал ругьунлъияз.
Улка цIуниялъул пачалихъияб комитеталъ лъазабун буго, гьел ругьунлъиязул цIаразго бихьизабулеб бугин, «гьеб ядерияб рагъалде хIадуриял рукIинин ва гьелдаса хIинкъи бугин Шималияб Кореялъул суверенитеталъейин». Гьеб комитеталъ хIинкъиял кьолел руго гьединго, гьитIинабцин рагъулаб асар загьирлъулеб бугони, гьужум байбихьиялъул.
«Превентивияб ритIухълъиялъул ядерияб кьаби щвезабизе буго Кореялъул халкъияб армиялъул нухмалъиялъ бихьизабураб къагIидаялда», - абун хъвалеб буго комитеталъул лъазабиялъул цитата хIисабалда Кореялъул централияб телеграфалъул агентлъиялъ.
Цебе Шималияб Кореялъул лидер Ким Чен Ыиница буюри кьун букIана бокьараб минутаялда ядерияб ярагъ хIалтIизабизе хIадурал рукIиналъул ва лъазабун букIана гьединаб мурадалъе улкаялъ жиндирго рагъулаб стратегия хисизабизе кколеб букIиналъул къварагIелалъул хIакъалъулъ.