Украиналъул вукIарав президент Виктор Януковичасде ва гьесул чукъаялде данде лъазарурал санкциял щуабилеб марталдаса байбихьун хIалтIизаризе хIукму гьабуна Евроцолъиялъ Брюсселалда рузман къоялъ тIобитIараб данделъиялда.
Януковичасул ва гьесул гор-свериялъул 15 пачалихъиял хъулукхъчагIазул банкалда ругел активал цIорозарун руго. Гьел ккола премьер-министрасул хъулухъалда рукIарал Николай Азаровги Сергей Арбузовги, Януковичасул администрациялъул бетIерлъун вукIарав Андрей Клюев ва цогидал.
Гьезде гIунтIизабураб гIайиб – пачалихъалъул гIарац бикъи. Сахлъи цIуниялъул министрлъун йикIарай Раиса Богатыревалъул цIар санкционияб сияхIалдаса нахъе цIан буго. Абулеб буго гьелъ бикъараб гIарац нахъе кьун бугин.