Насрудиновасул адвокатаз прокуратураялъул гьеб тIалаб кьучIгьечIеблъун рикIкIунеб буго, гьединго экс-вице-премьерасде гIунтIизарулел гIайибазул далилал гьересиял ругин лъазабулеб буго гьез.
Ахиралде щолеб буго Дагъистаналъул хIукуматалъул вице-премьерлъун вукIарав Насрудинов МухIамадхIусеница хIилла-рекIкI гьабун пачалихъалъул 300 ялдасаги цIикIкIун миллион гъурущ бикъиялда хурхун гьесда тIад гьабулеб бугеб диван.
29 февралалда букIараб диваналъул данделъиялда прокурорас Насрудинов микьго сонги анлъго моцIги кьун туснахъ гьавейилан тIалаб гьабуна.
2 февралалда букIараб иргадулаб данделъиялда Насрудиновасул адвокат Данила Паршиковас лъазабуна гьесде гIунтIизабулеб гIайибги кьучIгьечIеб бугила, гьереси далилалги хIалае ккун экс-вице-премьер гIайибиявлъун вихьизавизе къваригIун бугин прокуратураялъейилан. Гьединго адвокатас лъазабуна прокурорас
Насрудинов микьго сонгун бащадалъ жанив тIамейилан тIалаб гьабиги къануналде данде кколареб иш бугилан. Исана апрелалда лъагIел сверула гьеб ишалъул халгьабизе байбихьаралдаса нахъе, гьебщинаб мехалъ гьелда сверун Дагъистаналъул прокуратураялъ къануналда рекъон букIине кколедухъ жидерго хIалтIи гьабун бажаринчIинги абуна гьев адвокатас диваналда.
Цебехун «Эркенлъи» радиоялъ чанцIулго бицун букIахъе МухIамадхIусен Насрудиновасде гьес 2002 соналъ хIилла рекIкIги гьабун гьабун муниципалияб газалъул система бичиялъул гIайиб гIунтIизабулеб буго.
ЦIех-рехалъул баяналда рекъон ООО «Дагрегионгаз» ва ОАО «Даггаз» компаниязда гьоркьоб къотIи-къайги гьабун 200 миллионалъул багьа бугеб гьеб система гьес 58 млн. босун буго жиндиего.
Гьеб гурониги цойги чанги хIилла-рекIкIалъулал ишалги гьарун пачалихъалъул буголъи жиндидего буссинабунила гьес, гьедин улкаялъе 300 миллион гъурщидаса цIикIкIун зарал гьабунин Насрудиновасилан лъазабулеб буго Дагъистаналъул прокуратураялъ.
2014 соналъул 19 апрелалъ Москваялда хасал идарабаз ккуна гьев экс-вице-премьер. Диваналда Насрутдинов МухIамадхIусен жив гIайибияв вукIиналъе мукIарлъичIо. Гьес чанцIулго лъазабуна жинде кьучIгьечIел гIайибал гIунтIизарулел ругин.
Гьеб лъил букIаниги заказалда рекъон, ургъунго багъаризабураб иш бугилан. Гьебго пикру загьир гьабуна гьесул адвокатазги. Гьелда тIадеги Наструдиновас лъазабуна жинца Дагъистаналда газ бикъиялда данде рагъ балеб букIанин, гьелдаса разигьечIез ургъунго жиндие квешезе гьабунин гьеб ишилан.
Насрудиновасул ихтиярал цIунулев вугев адвокат Данила Паршиковас «Эркенлъи» радиоялъе бицана гьеб иш тIалъиялъул цIакъ кIудияб тIадецуялда гъоркь унеб бугилан. Жидеца диваналде ахIарал эксперталги, нугIзалги багьа-багьана батун гьенире рачIиналъе квекIенал гьарунила. Гьеб гурониги диванчияс жидеца рачарал далилазухъ гIинго тIамулеб гьечIилан.
Гьес абулеб буго диваналда Насрутдиновасде гIунтIизабулеб бугеб гIайибалъул магIнацин тIубан бичIчIулеб гьечIилан. Газалъул компаниязул буголъиялда хурхун гIемер батIи-батIиял суалал рижун ругила жидер.
Насрутдинов гьезул бича-хисиялда гьоркьов вукIинчIолъиги, гьес гьел ишазул жаваб кьолареблъиги бичIчIизе диваналъе бокьун гьечIила, уголовниял ишазул гурони халги гьабуларел, гражданское правоги бичIчIуларел ва лъаларел диванчагIазда гьеб кинабго бичIчIизабизе захIмалъулеб бугила.
Гьелде тIаде гьезие гьеб бичIчIизе къваригIун гьечIолъиги хIисабалде босизе кколила, гьезда цебе бугеб аслияб масъалалъун кколила Насрутдинов туснахъ гьавийилан абулеб буго Паршиковас.
Гьес 2 февралалда букIараб данделъиялда гьединго лъазабуна прокуратураялъ Насрудинов гIайибияв вукIин чIезабулеб цониги кьучI бугеб далил бачинчIилан. Гьелда тIадеги цIех-рехалъги прокуратураялъги гьеб ишалда тIад хIалтIулелъул гIемер къануналде данде кколарел ишал гьарунилан.
Данила Паршиков:«ГьадигIан цIакъ халатбахъараб цIех-рех тIобитIаниги Наструдиновасда гIайиб букIин чIезабураб цониги кьучIаб далил бачинчIо прокуратураялъ. Гьаниса – дораса росарал,рагIа-ракьанде щвечIел жидедагоцин магIна бичIчIуларел баяналги росун тIаделъун руго гьел Насрудиновасде.
«Межрегионгаз» компаниялъул вакиллъун вукIана гьезул юрист гьес цоцаде данде кколарел магIна гьечIел жал рицунел рукIана, гьединго жуба-гъубарал баянал кьуна гьезул рахъалдасан рукIарал нугIзадерицаги, амма гьелъул хIисаб гьабулев чи ккечIо цониги.
Зодоса босун гIайибги гIунтIизабун 8 сонги бащадалъги туснахъ гьавейин Насрудиновилан руго гьел чIун. Нижеца гьеб прокуратураялъ риччарал гъалатIазда тIасан чан гIарза хъваниги гьелъулги хIасилго ккечIо.
Дица ихтиярал цIунулев гIайибияв ватани чIезабеха гьесда тIад гIайиб, щиб гьабунги гьев жанив тIамизе хIаракат бахъулел рукIинчIого.
Гьез далилал хIисабалда гьереси документалгицин рачана диваналда. Масала, Насрудиновас газалъул система цIакъго учузго бичун букIин бихьизабулел гьес нухмалъи гьабулеб букIрааб «Дагърегионгаз» компаниялъул учредитель «Межрегионгаз» компаниялъул бетIер Никишиница гъоркь гъулбасарал документал рихьизаруна диваналда прокуратураялъ.
Гьел документазда хъвараб къо-моцIалъ бихьизабулеб буго автоавариялда Никишин хунхадуб хIадурун рукIин гьел».
Насрудиновасул ишалда хурхун иргадулаб данделъи анцIабилеб марталда тIобитIизе ккола.
