Воркутаялда "Северная" абулеб шахтаялда 25 февралалдаса 28 февралалде ккараб лъабго кьвагьиялъул хIасилалда хун вуго 36 чи, жеги 14 лъукъун вуго.
25 февралалдаса нахъе жал кир ва кинаб хIалалда ругелали лъачIого хутIун вукIарав 26 тIурчии бахъулев чIаго хутIизе рес букIинчIин гьатIан къоялъул къасиялде ккараб лъабабилеб кьвагьиялдаса хадубин лъазабуна
"Воркутауголь" компаниялъул техникияв директорас. Гьеб лъабабилеб кьвагьиялъ гьединго ун буго щуго хвасарчиясул ва цо чIурччи бахъулесул гIумруги.
25 февралалда «Северная» шахтаялда 800 гIан метраялъул гъварилъиялда цинтIаго метан къватIибе бачIиналъул хIасилалда ккун букIана тIоцебесеб кьвагьи. Гьеб шахта жанибе тIун буго ва гьениб цIаккун буго. Цин лъазабулеб букIана гьенив хварав ункъго ва виларав 26 чиясул. Коми республикаялда лъазабун буго чIегIербаялъул лъабго къо.