Европаялъул комиссиялъ загьир гьабуна Гуржиялъе визаби гьечIеб режим чIезабизе бугеб хIадурлъиялъул. Гьебго заманаялда, Украиналъе гьединаб низам чIезабиялде жал жеги хIадурал гьечIинги абулеб буго гьез.
Араб соналъул декабралда Еврокомиссиялъ абун букIана Шенгеналъул зонаялде визаби гьечIого рачIиналъе хIажатал шартIал тIуразарун ругин Гуржиялъ ва Украиналъин. Амма, гьедин букIаниги, цIар бицине бокьичIев Евроцолъиялъул вакилас, Эркенлъи Радиоялъе лъазабуна Украиналъул тIалъиялъ коррупциягун рагъ гIураб къагIидаялда балеб букIиналда жидер ракIчIун гьечIин. Гьединлъидал Шенгеналъул зонаялда хурхун Гуржиягун цадахъ Украиналъул бицине рекъон гьечIин.