Цолъарал Штатазул пачалихъияв секретарь Джон Керрица лъазабуна, живги жиндир Россиялъул коллега, къватIисел ишазул министр Сергей Лавровги Сириялда битIей чIезабиялда хурхун къотIи-къаялда хурхун цо пикруялде рачIанин ва жидеца гьеб документ гъулбасизе хадур гьабулеб бугин.
Керрил рагIабазда, бицен гьабулеб буго заманалъулаб битIей чIезабиялда хурхараб принципиалияб къотIи-къаялъул, гьесго абулеб буго гьеб документ хIалтIизе байбихьизе бегьулин гIагарисел къояздацинин.
Гьединаб лъазаби Керрица гьабуна Амманалда букIараб пресс-конференциялда. ГьатIан къоялда гьев дандчIвана Иорданиялъул къватIисел ишазул министр Насер Джудехгун.
Керрил рагIабазда, гьесги Лавровасги хьулал загьир гьарун руго гIагарисеб заманалда СШАялъул ва Россиялъул президентал Барак Обамаца ва Владимир Путиница Сириялъул проблемаби гьоркьор лъезе рукIиналъул ва гьеб принципиалияб къотIи-къаялда ахирисел хиса-басиял гьаризе рукIиналъул. КIиябго рахъалъ документалъул деталазда тIад хIалтIи рагIалде бахъинабулеб бугин, жубана Керрица.