Санкт-Петербургалда кIудияб манзилалъ юк баччулел шоферзабаз цIидаса «Мега-Дыбенко» абураб супермаркеталда аскIоб гIуцIун буго протесталъул мархьи.
«Юк баччулел автомобилистазул цолъиялъул» координатор Светлана Стошал рагIабазда, гьеб протесталъул акция халат бахъине буго «Платон» система тIубанго нахъе бахъизегIан.
Акциялда гIахьаллъулел рагIула Великий Новгородалдаса «дальнобойщикалги». Гьеб цолъиялъ тIибитIизабураб хитIабалда кIвар буссинабулеб буго гьединго полициялъ гьеб акция тIобитIиялъе кIвекIенал гьарулел рукIиналъул хIакъалъулъги.
Санкт-Петербургалъул «дальнобойщиказ» жидерго акция байбихьана Москваялъул Химкиялда жидерго мархьи гIуцIун протест загьир гьабулел автомобилистазул рахъ ккун.