Туснахъалда ругезул гIагараз гьезие хIажатаб къайи ва нигIматал туснахъазде ва колониязде интернет-тукадаса босун битIизе рес кьолеб бугин гьанжейин лъазабуна Дагъистаналда бугеб ТамихI тIубазабиялда хурхун федералияб хъулухъалъ.
Интернет-тукадаса босизе рес бугила кванил нигIматал, тIоцебесеб хIажалъиялъул къайи, ретIел-кун, ва цогидаб, чиясе хIажалъулеб жо. Гьеб кинабго къайиялъул багьабиги интернет-тукада цIикIкIараб гьечIила, цогидаб батIияб бакIалдасайин бицана «Эркенлъи» радиоялъе ТамихI тIубазабиялда хурхун федералияб хъулухъалъул пресс-хъулухъалъул нухмалъулев ГIамирхан ХIасановас.
Интернеталдаса къайи босизе рес кьолеб тукан бахъун буго «Нур» абураб гIуцIиялъ. Гьез туснахъалъул тIалъиялгун къотIи-къай гьабун буго, гьелда рекъон, гьеб тукадаса хIажатаб къайи-къоно босизе рес кьолеб буго туснахъазе.
Жанир тIамун ругезул гIага-божаразул кидаго гурин рес букIунеб цо хIажатаб жо босун колониялде рачIине, масала. Интернеталдаса гьеб бокьараб лахIзаталда босизе бегьулин, гьелъул квегIенлъи бугин баян гьабуна ГIамирхан ХIасновас, амма жакъа къоялде интернет-тукадаса пайда босарал чагIи гьечIила цониги туснахъалда.
ГIамирхан ХIасанов: «Гьеб сайталда аслияб куцалда кванил нигIматал, хасаб квен, къайи-къоно, кинабго туснахъалда ругезе биччалеб щинаб жо буго гьениб. БатIи-батIиял туснахъазда передачаби кьолел рокъор чIван руго игIланал, интернеталдасаги бокьараб жо босизе рес бугилан абун, амма цо кIудиябго кIвар гьечIо гьеб интернет-тукадул. Лъаларо, гIагаразда лъаларогонищ гьеб бугеб, яги гьезие квегIенлъийищ гьелъул гьечIебали.
Амма Дагъистаналъул туснахъазда руго гIураб къадар цогидал регионаздасдаса туснахъал, масала Гъабардаязулгун балкаразул республикаялдаса, Оренбургалдаса ва цогидал бакIаздаса. Гьединал чагIазухъе рачIине кIудияб захIмалъи ккола, моцIида жаниб бегьулеб цо нухалда гьезухъе рачIинги. Гьеб интернет-тукадаса къайи бачIинабуралъухъ абуни, гIицIго щунусго гъурущ туснахъалде курьерас щвезабуралъухъ тIаде кьезе ккола».
Туснахъазе моцIие бихьизабураб бачIине бегьулеб къайиялъул цIайи кколеб буго 30 килограмм. Жанир тIамуразул гIагарал аслияб куцалда гьезухъе щвезе унел руго кIудияб къадаралда къайи ва нигIматал цIадахъ босун, мугIрул мухъаздаса ва цогидал бакIаздаса гIемер рачIине рес ккунгутIиялъ.
Пайдаяб бугищ интернеталдаса гьеб кинабго босизе рес кьолеб хъулухъали цIехана «Эркенлъи» радиоялъ МахIачхъалаялда бугеб туснахъалда жанив вугев Мусаев МухIамадица. Мусаев жанив тIамун вуго кодор наркотикал ратиялда бан. ГьабсагIат гьес тамихIалде цIаралдаса кIиабилеб сон балеб буго жаниб.
Гьесие бокьичIо жиндирго росу ракь рехсезе. МугIрул мухъалдаса моцIида жаниб кIиго нухалъ рачIунин жинда хадур, амма жидие гьелъулги нич букIунин эбел-инсуда цебейин абулеб буго Мусаевас.
Интернеталдаса хIажатаб жо бачIинабиялъул гьес бицана жалго дагъистаниязе гьеб хIалтIизабизе захIматаб бугин, гIемерисел бакIазда онлайн гIарац кьей ва банкоматал гьечIила, гьелъ, гьеб тIибитIиги щакаб бихьулила жинда.
Мусаев МухIамад: « МагIарухъа, цогидал рикIкIада бакIазда ругел гIагаразе гьелъул щибго квегIенлъи гьечIо. Щай гурелъул, дир руго, масала, херал эбел эмен, гьезда интернет-тукан щибжояли лъаларо. Херал гьечIониги, росабалъ, районазда ругел чагIазе квал-квал букIуна кIудияб банкоматал ралагьизе ва цогидаб щинаб гьабизе.
Гьеб интернет-тукадул квегIенлъи букIина Россиялъул цогидал регионаздаса туснахъазе. Гьединалги руго нилъер туснахъазда кIудияб къадар. Жалго дагъистаниязе гьел къабуллъи щакаб буго, дир хIисабалда».
«Sizomag05» абураб интернет тукан гIадинаб, туснахъазе жо чIезабулел интернет-сурсатал жеги руго интернеталда, масала бищунго цIар тIибитIараб гьезда гъорлъ кколеб буго «Заказ передачи» абураб интрнет-портал. Гьелъ къайи щвезабулеб буго гьоркьохъеб Россиялъул чанго регионалде.
