Атомияб хIинкъигьечIолъиялда хурхарал цIиял хIинкъаби раккана Шималияб Кореялъ цIикIкIараб радиусалъул ракета боржине биччанин лъазаби гьабун хадуб.
Улкаялъул телевидениялъ 7 февралалда лъазабуна лидер Ким Чен Ынил тIадкъай тIубазабун, космосалде спутник биччан бугин. Пхеньяналъ лъазабулеб буго тIубараб икъбалалъул. Гьезго лъазабухъе, «Кванмёнсон-4» абулеб спутникалъ Ракь сверун буго 94 минуталде. Шималияб Кореялда ракIалда бугин нахъеги спутникал риччазейин лъазабулеб буго Пхеньяналъ.
Жанубияб Кореялъул ва Америкаялъул рагъулаз абулеб буго гьеб бугин атомияб ярагъгун боржине рес бугеб баллистикияб ракета биччаялде гьабулеб хIадурлъийин. Вашнгтоналъ рикIкIунеб буго Пхеньяналъ гьабулеб ахIвал-хIал хIалуцинабулеб ва провокациялъул иш бугин.
Россиялъ рикIкIунеб буго Пхеньяналъул ишаз Шималиябгун-Машрикъалъул Азиялда ситуация хIалуциналде рачине рес бугин.
КIудияб гIагали бижинабулеб галийин абуна Пхеньяналъул гьеб лъазабиялде Цолъарал Миллатазул ГIуцIиялъул генералияв секретарь Пан Ги Муница.
Январалда Шималияб Кореялъ лъазабун букIана жидеца икъбалалда тIобитIанин водородалъул бомбаялъул хIалбихьигийин.