Чачанлъиялъул бетIер Къадиров Рамзаница лъазабуна гьеб хъулухъалда жиндир болжал лъугIулеб букIин жинда кIочонго бугоанин ва гьеб жинда журналистаз ракIалде щвезабунин. ЦIияб болжаладаги гьеб хъулухъалъе гIоло жив вортанхъизе вугевищали жинда жеги лъаларин хъван буго гьес жиндирго Инстаграмалда ва тIадеги жубан буго «гьединаб гIиси-бикъинаб жоялъул пикру гьабизе къваригIун гьечIин жиндиейин». Гьебго заманаялда Къадировас рикIкIунеб буго республикаялъул бетIерлъуда чи Россиялъул президентас тезе кколин.
Чачанлъиялъе Къадировас нухмалъи гьабулеб буго 2007 соналъул марталдаса нахъе. Гьеб хъулухъалда гьесул болжал лъугIуна исана 5 апрелалда.
Чачаназул Конституциялда 2012 соналда гьарурал хиса-басиязда рекъон, республикаялъул бетIерлъуде кандидатал рихьизарула политикиял партияз ва рищиял тIоритIула рищиязул цогояб къоялъ 18 сентябралда.