Кабул бакьулъ парламенталъул ва полициялъул минабазда аскIоб живго чIвалес гьабураб кьвагьиялъул хIасилалда хун вуго ичIго чи. Улкаялъул жанисел ишазул министр хисулев Аюб Салангица гьединго абуна гьеб кьвагьиялъ 20-гIан чи лъукъунги вугин. Кабулалъул полициялъул вакилас лъазабулеб буго гьеб кьвагьи гьабурав чи полициялъул бутIаялде жанире ине чIарал гIадамазул читIиралъулъ вукIун вугин ва хваразул цIикIкIунисел гIадатиял гIадамал ругин. Гьединго хун вуго кIиго полициявги. Гьеб кьвагьиялъул жавабчилъи тIалибаз тIаде босун буго. Кабулалда ахирал моцIазда гьарун рукIана анцI-анцI чи чIварал цоги кьвагьиялги.