Буркина-Фасоялъул тахшагьар Уагадугуялда рагIалде бахъун буго цебесеб сордоялъ яргъидгIуцIараз кверде босун букIараб петер эркен гьaбиялъул операция. Эркен гьавун вуго, ахирисел баяназда рекъон, гьез гъоркьлъалие восун вукIарав 150 чи. ЧIван вуго тIадекIанцIи гьабуразул лъабгояв. Буркина-Фасоялъул тIалъиялъ лъазабуна шамат къоялда Франциялъул хасал аскаразул кумекалдалъун хIукуматалъул къуватаз эркен гьабунин Splendid абулеб петерин. France-Presse-лъул баяназда рекъон, гьеб тIадекIанцIиялъул хIасилалда хун вуго батIи-батIиячл улкабаздаса 27 чи ва жеги анцI-анцI лъукъун вуго.
Рузман къоялъул къаси петералъул минаялда жаниб букIараб кафеялде кIанцIарал тIомол кьер чIегIерай ясалъ ва гIолилаз «Аллагьу Акбарин» ахIулеб букIанин бицун буго ккаралъул нугIас. Гьениб багъарун буго ахIи-хIур, цинги 20 минуталдасан гьениб сихI къотIун буго, гьелдаса хадуб цIидасан байбихьун буго кьвагьизе. Полициялъул операция рагIалде бахъун буго шамат къоялъ. Гьеб тIаде-кIанцIиялъул жавабчилъи тIаде босун буго «Магърибалъул исламияб улкабазда Аль-КъагIида» абулеб экстремистияб къукъаялъ.