Россиялъул инсанасул ихтиярал цIунулезул ва искусствоялъул хIаракатчагIазул къукъаялъ ракIарулел руго Чачанлъиялъул бетIер Къадиров Рамзан хехгьабун гьеб хъулухъалдаса вахъеян тIалабгун гъулбасал. Гьединаб лъазаби кьун буго Интеллигенциялъул Конгрессалъул сайталда.
Гьелъул автораз какулеб буго "системалъул гуреб оппозиция халкъалъул тушбабазда бащад гьабиялда хурхараб" Къадировасул ахIи. Гьез рикIкIунеб буго "федерациялъул субъекталъул бетIерас ракълилаб жамгIияталъул цо бутIаялъе хIинкъаби кьей моралияб рахъалдасан гуребги ихтияразул рахъалдасанги биччазе бегьуларин». Гьеб лъазабиялда абулеб буго "жамгIиябгун-политикияб ракълилаб багъа-башариялда гIахьаллъи хилиблъилъун ва улка чучлъизабизе бахъулеб хIаракатлъун рикIкIиялъулъ бугин битIухъе хIинкъаби кьеялъул хасиятин».
«Рамзан Къадировас цо нухалъ гуреб Россиялъул Федерациялъул къанунал санде гьарулел гьечIел. Гьес нухмалъи гьабулеб Чачанлъиялда бетIер борхизе толаро гьесул кинаб букIаниги критика гьабизе вахъарав чиясда, цо моралияб куцалда гуребги, битIахъе зулму гьабунги",-ян абулеб буго Интеллигенциялъул Конгрессалъул лъазабиялда. Гьединаб лъазаби гьабун буго инсанасул ихтиярал цIунулел Людмила Алексеева, Валерий Борщев, Юрий Вдовин, Светлана Ганнушкина, Игорь Каляпин, Лев Пономарев, режиссер Владимир Мирзоев ва хъвадарухъан Людмила Улицкая гIадинал чагIаз.