Россия хIадураб буго-хIажалъи ккани-Сириялъул президент Башар Асадие лъутизе бакI кьезе. Гьедин лъазабулеб буго талат къоялда къватIибе загьир гьабураб Россиялъул президент Владимир Путиница Алманиялъул Bild газетаялъе кьураб интервьюялъул бутIаялда.
Путинил рагIабазда рекъон, гьеб суал цебелъейго битIараб гьечIо, щайгурелъул Сириялда рищиял тIоритIун хадуб Асадица жиндирго улка тезе ккечIого букIинеги рес буго.
Россиялъул лидерас рикIкIунеб буго Сириялда конституционияб реформа гьабизе кколин ва хадуб иргадулал гурел парламентиял ва президентасул рищиял тIоритIизе кколин. Россиялъе бокьун гьечIо Сириялда ахIвал-хIал Либиялда ва ГIиракъалда гIадин цебетIезейин абун буго нахъеги Путиница. Гьес рикIкIунеб буго Сириялда гIадатияб халкъ холеб букIиналъул гIайиб Асадиде данде къеркьолезда бугин.