Цолъарал миллатазул гIуцIиялъул ХIинкъигьечIолъиялъул Мажлисалъ, Жанубияб Кореялъ ва Япониялъ эксрениял консультацияби гьаруна Шималияб Кореялъ ядерияб хIалбихи гьабиялда хурхун.
Япониялъул премьер-министр Синдзо Абэца какана Пхеньяналъ гьабураб кьвагьи ва лъазабуна, жиндир улкаялъе гьелдаса хIинкъи бугин.
Токиоялъги Сеулалъги лъазабуна Шималияб Кореялъе «тамихI» гьабиялъе цадахъал галаби гьаризе ругин.
ХъахIаб Рукъалъ лъазабуна, Пхеньяналъе жаваб кьеялъул мурадалда данде кколел галаби гьаризе рукIиналъул хIакъалъ. Цолъарал Штатазул Милияб хIинкъигьечIолъиялъул мажлисалъул вакил Нед Прайсица лъазабуна, Цолъарал Штатал Цолъарал миллатазул гIуцIиялъул ХIинкъигьечIолъиялъул Мажлисалъул резолюция хвезабулеб бокьараб улкаялде данде ругин жалин.
Пхеньяналъул ядериял хIалбихьияззде жидерго квешаб бербалагьи загьир гьабуна Китаялъ, Британиялъ, Германиялъ ва чанго цогидал улкабаз.
Кремлалъги загьир гьабуна Пхеньяналъул ядерияб кьвагьиялда бан цIакъ ургъен ккун букIиналъул жиндирго пикру. Россиялъул президент Владимир Путиница буюри кьуна щвалде щун суалалъул хал-шал гьабиялъул.
Гьелъул хIакъалъулъ лъазабуна президентасул пресс-секретарь Дмитрий Песковас.Цебесеб моцIалда Ким Чен Ыница лъазабун букIана, Шималияб Кореялъ гьабунин водородалъул бомбайин. Амма Магъриб гьелда божун букIинчIо. «Франс-пресс» агентлъиялъул лъазабиялда рекъон, жакъаги гьединб бомба гьеб букIиналда бан щаклъи рагIула магърибалъул специалистазул.