Россиялда рагьун буго 900-ялдаса цIикIкIун такъсир гьабиялъул иш Сириялда ва ГIиракъалда рагъулел рукIарал улкаялъул гражданазда тIад. Гьедин лъазабулеб буго Думаялъул депутат Валерий Рашкинил тIалабалъе жаваб кьолаго Жанисел ишазул министерлъиялъ. Гьелъул копия щун буго РБКялъухъе.
Гьелде тIадеги, Жанисел ишазул министерлъиялъ ФСБялда цадахъ хал ккун буго Сириялда ва ГIиракъалда вагъизе Россиялдаса арав лъабазарго гIанасев чиясда хадуб. Гьеб документалда абулеб буго Россиялъул хасал хъулухъазда тIатун вугин гьенире рагъизе ине гIадамал ахIулев 92 чийин.
15 декабралда ФСБялъул директор Александр Бортниковас бицен гьабулеб букIана Сириялда ва ГIиракъалда ругел ва Россиялда гьукъарал террористиял къукъабалъе лъугьарав лъабазаргоялдаса цIикIкIун чиясул. Гьесго абулеб букIана Россиялде тIадвуссун вугин 214 чи, гьезулги 80 жанив тIамун вугин.
ФСБялъул директорас гьединго лъазабуна улкаялда 1600 фирмагун гIадатив чиясул хал гьабулеб бугин гьез Россиялда гьукъараб «Исламияб пачалихъ» террористияб къукъаялъе финансазул кумек гьабулеб букIиналда щаклъи ккунин.