Россиялда «Платон» системаялде данде ругел юк баччулел автомашинаби рачунезда ракIалда буго 25 декабралдаса байбихьун щибаб къойил улкаялъул федералиял нухазда «чIунхулух» ай «улитка» абулеб акция тIобитIун бищунго дагьаб хехлъиялда ине ва гьелдалъун хехго ине цоги машинабазе рес кьунгутIизе. Гьединаб хIукму гьабун буго 57 регионалдаса рачIарал акциячагIазул данделъиялда. Москваялда гьеб акция гьабизе гьечIин абун буго гьез, гьедингоги щибаб къойил кIиго нухалда «чIолеб» Москваялда жидер гьеб акция бихьизецин гьечIин.
12 тоннаялдаса цIикIкIун юк баччулел автомашинабаз 15 ноябралдаса нахъе «Платон» абулеб системаялъе кьезе кколеб буго цIикIкIинабураб нухлул хIакъ. Гьелде данде Дагъистаналда лъазабун букIараб акция къотIизе тун буго 23 декабралдаса нахъе.