Нилъеда лъалеб бакIалдаса жакъасеб Россиялъулги Дагъистаналъулги законал рахъулеб тIалъиялда (парламенталда) ва гьел тIуразарулеб тIалъиялда (хIукуматалда) киналго тахбакIал ккун ругин абизе бегьула тухумчилъиялъ. Цо чи цеве ккани тухум-кьибилго лъугьуна "генияллъун". Министразул лъимал депутаталлъун, депутатазул лъимал - прокурораллъун. Покуроразул лъимал - судияллъун. Судиязул лъимал - министраллъунги, депутаталлъунги, прокурораллъунги судияллъунги.
Гьебни гIадатиял ришваталги росулел гьелги кьолел гражданазул жанисеб вала-рахасин тела. Кинабха бугеб ахIвал-хIал гьеле гьел такъсиралъе тамихI къотIизе тIаса рищарал диванчагIазул (судиязул) ва жибго ТIадегIанаб Диваналъул ахIвал-хIал?
Нижеца "Миллат" казияталда кIиго соналъ цебе бахъун букIана Дагъистаналъул судазда бугеб тухумчилъиялъул бицараб макъала. КигIан улкаялъул бетIер В.Путиница рацIцIадго хIалтIизе ахIаниги, республикаялъул бетIер ГIабдулатIиповас хитIабал гьаруниги, ахIвал-хIал добго хIалалъ хутIана.
Хъулухъ ирсалъе щвейги, тухумчилъиги, ришватчилъиги, жиде-жидер миллат цебе гьабиги – гьеле нужее Дагъистаналда судияллъун тIамиялъе ругел гIиллаби ва аслиялин абизе бегьулел шартIал. Масала, ДРялъул Верховный судалъул судиясул дурц вуго Избербаш шагьаралъул судияв, кIиявго вацин абуни Гъизляралъулги Хасавюрталъулги районазул судиял. Иргаялда руго васги, вацгIалзабиги, яцалги судиязул тахбакIазда хадур.
ДРялъул Верховный судалъул Президиумалъул член, экзаменационный комиссиялъул председатель И. Д. Августиналъул рос ккола Гъизляр шагьаралъул судияв (гьелъие гьединаб битI ккана ДРялъул Верховный судалъул председательлъун вукIарав Анвар МухIамадов сабаблъун – Дербенталъул мэрлъун вахъине Имам Яралиевасе рекъараб хIукму къотIаралъухъ абураб баян букIана чанго соналъ цебе информациялъул алатазда.
ДРялъул судиязул квалификациялъул коллегиялъул нухмалъулевлъун вукIарав И. Гьаруновасул яс МахIачхъалаялда мировой судияйлъун йиго. Судиязул составалъул председатель Х. Шихгереевасул вац Табасаран районалъул судияв ккола. МахIачхъалаялъул Ленинский районалъул судияв АхIмадхановасул дурц МахIачхъалаялда мировой судиявлъун хIалтIулев вуго.
Верхсудалъул председателасул заместительлъун вукIарав М. М. Ибрагимовасул вац Болъихъ районалъул судияв ккола. ДРялъул Судалъул департаменталъул управлениялъул начальник М. Д. ГIумаровасул вацал-яцазул лъимал ДРялъул Арбитражалъул ва Сергохъала районалъул судияллъун руго, гьесул васин абуни МахIачхъалаялъул Советский райсудалъул судиявлъун вахъине хIадурулев вуго. Гьеб Советский районалъул судалда хIалтIулев федералиявниги мировойниги 25 судиясда гьоркьоса микьгоял дарги миллаталъул чагIи ккола.
ДРялъул Конституциялъул судалъул председательлъун вукIарав С. ХIажимухIамадовасул вацасул вас вуго МахIачхъалаялъул Кировский районалъул судияв, кIиявго васин абуни Арбитражалъулгун Верхсудалъул судазда судияллъун.
Верхсудалъул судияй А. Ибрагьимовалъул эмен ккола Дагъогни шагьаралъул судалъул председатель. ДРялъул Верхсудалъул председательлъун вукIарав А. МухIамадовасул вас М. МухIамадов Верховный судалъул судиявлъун тIамизе вихьизавун вуго, вацасул васин абуни ккола судиязул квалификациялъул коллегиялъул член. Верхсудалъул председателасул лъадул вац М. Нестуров ккола Кировский районалъул судиявги экзаменационнияб комиссиялъул членги. Кировский райсудалъул председателасул М. Амировасул дурц вуго Верхсудалъул судияв.
Гьединал мисалал гIезегIан руго. ДРялъул Верхсудалъул судиязул 52 кумекчиясул 36 чи ккола судиязул лъимал, гIага-божарал. Гьединлъидал гьел тухумазулгун кинабгIаги бухьен ялъуни кIудияб гIарац гьечIого, гIадатияв чи бигьаго гьеб системаялда гъорлъе кколеб хIал гьечIо.
Гьеб ахIвал-хIалалда рес бугищ жакъасеб Дагъистналда гражданазул ихтияралги, бацIцIадаб бизнесги, зконалда ругел ва гьечIел рэкетазул гьужумги судалъул кумекалдалъун цIунизе? ГьечIо, гьечIебгIан заманаялъ нилъер республика кигIан Кавказалъул рухIияб центр ва некIсияб цебе тIураб улкаян нилъеца керен бухханиги хутIизе империялъул жанубияб рахъалда бугеб мукъсанаб ва мискинаб рагIаллъилъун - Дагъистан гуреб Кишлакистан.
Гьеб мугъру нахъе гьабизе ккани тIоцебесеб иргаялда бацIцIад гьабизе ккола ТIадегIанаб Диван долларазул, кьолеб босулелъул ва тухумчилъиялъул гIузрабаздаса. Хабар лъикIаб рагIайги.
-----------------------------------
Авторасул пикругун Эркенлъи Радиоялъул пикру данде ккечIого букIинеги рес буго.
