Россиялъул оппозиционияв политик Борис Немцов чIваялъул ишалда сверун цIех-рехалъул аслияб хIалтIи рагIалде бахъун буго. Гьениб кколеб бугеб лъикI лъалев чиясда мугъчIвагун «Росбалталъ» лъазабулеб буго жанир тIамун ругел Анзор ва Шадид Губашевазул, Заур Дадаевасул, Тимерлан Эскерхановасул ва ХIамзат Бахаевасул ишалъул хал батIаго гьабизе буго. Гьаб сон лъугIилалде гьезул щивасда гIунтIизабизе буго, ахирисеб редакцияги гьабун, гIайиб.
ЦIех-рехалъул комитеталъухъ хутIизе буго МухIудинов Русланил ва щалали лъаларел гьесие тIадкъай кьурал чагIазул иш. Низам цIунулезул версиялда рекъон, МухIудиновас тIадехун рехсаразде абун буго гIарцухъ Немцов чIвазе кколин. Гьев валагьулев вуго.
Немцов чIван вукIана 28 февралалъул къаси Кремлалда аскIов.