Афгъанистаналда ругел тIалибазул лидер Ахтар Мансур захIматго лъукъун вуго Пакистаналда авлахъалъул командиразул данделъиялда ккараб дагIба-рагIиялъул хIасилалда. Гьедин гьеб багъа-башариялда кIудияб рикьелги лъугьун буго. Гьедин лъазабун буго Афгъанистаналъул тIоцевесев вице-президент ГIабдул Рашил Дустумил пресс-хъулухъчи СултIан Файзица Эркенлъи Радиоялъул афгъаназул хъулухъалъе. Гьес гьединго абун буго Мансур азарханаялде щвезавун вугин ва гьев чIаго хутIиялда божилъи дагьаб бугин.
Гьесулго баяналда рекъон, Мансурил дагIба ккун буго 1 декабралда Качлах Кветта абулеб бакIалда ГIабдулла Сардари абулев цоги рагъулав командиргун. Гьев Гуантанамо туснахъалдаги жанив тIамун вукIун вуго цеве. Сардариги цоги ункъго авлахъалъул командирги гьенир чIванги руго.