Украиналъул президент Петр Порошенко тIаса лъугьун вуго Донбассалда сепаратистазул рахъалда вагъулев вукIарав ва туснахъалъул 14 сон кьурав Россиялъул гражданин Владимир Страковасда. Порошенкоца гьеб гали хурхинабулеб буго Россиялъул асирлъиялдаса Украиналъул аскарияв Андрей Гречанов эркен гьавиялда. Порошенкоца бицухъе, 81-билеб гьужум гьабулеб десанталъул бригадаялъул цо бутIаялъул командир Андрей Гречанов эркен гьавизе кIун буго 18-билеб нухалда бахъараб хIаракаталдалъун. Гьев эркен гьавизелъун Россиялъул президент Владимир Путинида тIадецуй гьабейин жинца гьарун букIанин Алманиялъул канцлер Ангела Меркелидаги Франциялъул президент Франсуа Олландидаги ян бицана гьес. Израилалъул премьер-министр Биньямин Нетаньяхуца гьесие бачун буго жидер цо капрал эркен гьавизелъун жидеца азарго палестинав экрен гьавиялъул мисал.
Андрей Гречанов Донбассалда сепаратистаз асир гьавун вуго исана августалда. Россиялъул армиялъул майор Владимир Старков ккун вукIана исана июлалъул ахиралда.