Азербайджаналда низам цIунулез талат къоялда хасаб операция тIобитIулеб букIана Бакуялъул Нардаран абулеб авалалда. Низам цIунулез лъазабулеб букIана гьеб операция тIобитIулеб бугин гIадамазул ихтияралгун эркенлъаби цIунизелъун ва къануналде данде кколареб куцалда гьезухъ бугеб ярагъгун кьвагьулел жал нахъе рахъизелъунин. Эркенлъи Радиоялъул азербажан хъулухъалъ лъазабулеб буго Нардараналде рагъулаб бакIаб техникаги бачун бугин, гьенире нухалги къан ругин ва гIадатиял гIадамазул рукъзабахъ чIухьги тIамулеб бугин.
Бакуялда бугеб Ираналъул вакиллъиялъ лъазабуна Нардараналда кколеб бугелда Тегераналъул кинабгIаги хурхен гьечIин.
26 ноябралда Нардараналда «Бусурбабазул цолъи» абулеб багъа-башариячлъул лидер Талех Багирзаде кколаго полициягун букIараб тунка-гIусиялъул хIасилалда хун вукIана анкьго чи. Гьездаго гьоркьов кIиго полициявги. «Бусурбабазул Цолъиялда» Бакуялъ гьабулеб буго нухмалъи рехизе хIаракат бахулеб букIиналъул гIайиб. Гьеб цолъиялъ гьеб гIайиб нахъчIвалеб буго.