МагъчIваялъе рес

Регионаздаса Москваялде протесталъул акциялда гIахьллъизе унел руго автомобилистал


15 ноябралда хIалтIизе биччараб «Платон» абураб федералиял трассабаздаса пайда босиялъухъ мухь борхизабулеб системаялде данде протесталъул акциялъул гIахьалчагIазул рахъ ккун пикетал гIуцIулев вукIарав 13 активист ккун вуго Москваялда 29 ноябралда.

ГьатIан къоялдаго Петербургалда аскIобехун бугеб Гатчина шагьаралда ккун вуго Петербургалъул юк баччулел автомобилистазул протесталъул акция гIуцIарав Александр Расторгуев.

Москваялъ жидерго протесталде кинаб гIаги кIвар буссинабулеб гьечIолъиялъ, ноябралъул ахирисел къоялда Росиялъул батIи-батIиял регионаздаса юк баччулел жидерго автоколоннабигун нухде рахъун руго Москваялда тIолабго Россиялъул гIаммаб протесталъул акция тIобитIиялъул ва тахшагьаралда сверун бугеб нух къаялъул мурадалда.

Москваялде сапаралде бахъана гьединго Дагъистаналдаса 200 гIанаб юк баччулеб автомобилалдаса автоколоннаги. Амма информалатаз лъазабулеб буго, гьеб автоколонна нухлол полициялъ Калмыкиялъул гIорхъи бахине биччачIин.

Гьединабго гIарз «Дождь» телеканаладасахун загьар гьабуна юк баччулезул вакил Сурхай ГIалимирзаевасги.

Гьединал инцидентазул хIакъалъулъ гIемер лъазабиял руго цогидал регилоназдасаги.

XS
SM
MD
LG