Франциялъул полициялъ гьатIан къояла ккун вуго Парижалда терактал гьаруразул цоясул гIагаразул ва гьесда лъалел рукIаразул чанго чи.
France-Pressалъ низам цIунулезда мугъчIвайги гьабулаго кьолел баяназда рекъон, ккун вуго анлъго чи, гьезда гьоркьор руго 29 сон букIарав Франциялдаса ГIумар ИсмагIил МустIафаил эменги вацги. Гьев теракталда гIахьаллъи лъан буго «Батаклан» концертазул залалда батараб килщидасан. Гьенив чIван вукIана 89 чи ва жалго кьвагьизарун рукIана тIадекIанцIи гьабуразул лъабгояс. Гьединго абулеб буго МустIафа цевеги криминалиял ишазулъ гIахьаллъарав чи вукIанин.
Парижалда гъоркьехун батун буго Seat тайпаялъул автомашинаги. НугIзазул рагIабазда рекъон, гьелда рукIун руго тIадекIанцIи гьабуразул цо къокъа. Автомашинаялъуб ярагъги батун буго.
13 ноябралъул сардилъ Парижалде гьарурал гьужумазул жавабчилъи «Исламияб пачалихъ» экстремистияб къукъаялъ тIадебосун буго. Гьел тIадекIанцIиязда хун вуго 129 чи, лъукъун вуго 350 ва гьезулги нусгогIан чи захIматаб хIалалда вуго.
Прокуратураялъ лъазабулеб буго тIадекIанцIиял гьарун рукIанин анкьго чияс, гьезул анлъгояв жалго жидецаго кьвагьизарунин, цояв полициялъ чIванин. Гьезухъ рукIун руго Калашниковасул автоматалги, кьвагьулел ручлулги. ЦIех-рехалъ абулеб буго щаклъи бугин гьезул кумекчагIи рукIиналда ва гьезда лъутизе бажарун букIиналдайин.