Шималияб ГIиракъалдасан лъазабулеб буго Пешмергиялдаса курдазул рагъухъаби Синджар шагьаралде жанире лъугьун ругин. Гьезие кумек гьабун буго Америкаялъул авиакьабияз. Гьеб кколеб буго «Исламияб пачалихъ» экстремистияб къукъаялде данде гьабулеб гьужумалъул цо бутIалъун.
Гьеб бакIалдасан цIиял харбал кьолев Reutersалъул мухбирасги лъазабулеб буго 13 ноябралда курбазул рагъухъаби Синджар шагьар къотIун унеб аслияб нухдасан гьенире жанире лъугьанин.
Гьеб нухдасан цоцазулгун бухьен ккун букIун буго Сириялъул Ракка шагьаралда ругел ва ГIиракъалъул Мосул шагьаралда ругел экстремистаз ва гьеб букIун буго гьез хIажатаб баччулеб нухлъунги. Синджар гьез кверде босун букIана араб соналъул августалда ва чIван вукIана аза-азар гIадатияв чи, аслияб куцалда езидал.