Кремлалъ рикIкIунеб буго допингазде данде бугеб тIолгодунялалъул Агентлъиялъ (WADA) Россиялъул атлетазда ва тIалъиялда гьарулел гIайибал гъоркь кьучI гьечIел ругин.
Россиялъул президентасул пресс-секретарь Дмитрий Песковас абуна кинал рукIаниги далилал рачинегIан гьел киналго гIайибазухъ гIинтIамизе захIматаб бугин.
Гьес гьединго абуна 2016 соналда Олимпиадаялъул хIаязда Россиялъул атлетал гIахьаллъизе гьукъиялъул суал Кремлалъул гуреб Минспорталъул иш бугинги.
9 ноябралда допингазде данде бугеб тIолгодунялалъул Агентлъиялъ загьир гьабураб докладалда абулеб буго Москваялда допингал тIатинарулеб лабараториялъул хIалтIуде гъорлъе лъугьун ФСБялъ ва Минспорталъ жидее данде кколарел тестазул хIасилал тIагIинаризелъун гьелъие тIадецуй гьабулеб букIанин. Гьедин жидер комиссия тIаде щвелалда рехсараб лабораториялъул директорас цоги лабораториязде битIиларедухъ 1400 допинг-тест тIагIинабун бугин. Рехсараб агентлъиялъ (WADA) тIадагьаб атлетикалъул тIолгодунялалъул Федерациялде абун буго Россиялъе дисквалификация гьабейин ва гьелъул атлетал къецазда гIахьаллъизе тогейин.