Цолъарал Миллатазул ГIуцIиялъулъ лъайкьеялъул, культураялъул ва гIелмуялъул рахъалъ бутIаялде (ЮНЕСКОялде) Косово босиялде данде гьаракь кьун буго Россиялъ. Гьеб гьаркьалкьей унеб букIана итни къоялда гьеб идараялъул Генералияб конференциялда Парижалда.
Гьеб хIукмуялъул рахъккун гьаракь кьун буго 92 улкаялъ, данде-50. Косовоялъе гIун гьечIо лъабго гьаракь. Данде рукIаразда гьоркьоб букIун буго Россияги Сербияги. Гьедин лъазабулеб буго Эркенлъи Радиоялъул балканазул хъулухъалъ.
Косово лъидаго бачIеблъун рикIкIунеб буго 110 улкаялъ. Россиялъ жиндир рахъ кколеб Белград гьеб хIукмуялде данде буго.