Документазул хал гьабизе чIезарураб бакIалда кьвагьун буго гьезул цояс полициялъуласде. Цинги азарханаялде хъамураб бакIалда хунги вуго гьев.
Полициялъул баяназда рекъон, гьеб бакIалда лъабгоял рукIун руго. Цояв - Руслан Парсилаев - ккун вугин, кIигоял тIурун ругин абулеб буго. Рехсолел руго гьел тIурун аразул цIаралги – Завур Хамутаев ва Азамат Шихачев. Цо-цо баяназда рекъон, гьел кколел руго федералияб цIех-рехалда ругел, Бабаюрт мухъалдаса, гIумрудул сонал лъеберилъе рахарал чагIи. Рохьилаздехун бухьен букIиналъул хабарги буго гьениб.
Масала, Завур Хамутаев кколаанин Россиялда гьукъараб «Имарат Кавказ» гIуцIиялъул вакилилан бицана Москваялъул радиоялдасан кIалъалаго Денис Меркуловас. Москваялда бугеб Дагъистаналъул официалияб вакиллъиялъул комиссиялъул нухмалъулев ккола гьев. Хамутаев ахираб заманалда гIемер вачIунев вукIанин Москваялдеянги бицана Меркуловас, цере гьесулгун лъай-хъвай букIарал чагIазе бокьулеб букIинчIила гьевгун дандчIвазе.
Гьединго Азамат Шихавовасул рахъалъ полициялъухъ ругел баяназда рекъон, гьев унев вукIун вуго Бабаюрталъул изну гьечIого яргъид гIуцIаразул къокъаялда гъорлъе, гIахьаллъун вуго 20I2 соналда полициялъул капитан Расул Качмасов чIваялъулъги.
Гьеб хIужаялъ Москваялда дагъистаниязда хадуб халкквей чIезабулеб бугин бицана ЭР-ялъе Москваялдаса журналист Елена Романовалъ. Масала, Хасавюрталдаса журанилистал рачIун рукIанила доре цо конференциялде. Дагъистаниял рукIин бичIчIидал, полициялъ гьел ункъо сагIаталъ сурав босулел чIезарунила Ленинский мухъалда тира=сверизе къватире рахъараб мехалда.
Елена Романова: «Тукаде унел рукIарал чагIиха гьел, цинги ва! Нуж дагъистаниял руго гурищилан, рачун ун руго. ТIадежоялъе паспорталдаги хъван буго гьезул Хасавюрталдаса ругилан. Бабаюртги Хасавюртги релълъарал цIаралги гьечIищха. Гьедин буго иш – гьанже цогидазеги – гIадлу-низамалда хьвадулел дагъистаниязе - къваригIараб жойищ гьагъаб букIараб. ПалхIасил, цересан киналго дагъистаниязул документазул хал гьабизе кьураб тIадкъай бугин ккола. Гурони гьал журналисталги полициялда ункъо сагIаталъ чIезарилаанищха».
Москваялда гIумру гьабулев Дагъистаналдаса тохтур ГIабдурашид СагIидовас рикIкIунеб буго цебе гIадин гьанже москваялъулазе гьединаб кIудияб асар гьабулеб гьечIин полициялъулав чIвай гIадал такъсираз, щайин абуни гьелдасаги кIудиял такъсирал цIикIкIунел ругила.
ГIабдурашид СагIидов: «Ахираб заманалда, тушбаби цIикIкIиналъ батила, гьединал хIужабаз кIудияб асар гьабулеб гьечIо москваялъулазе. ГIадатияблъун лъугьун буго зулму – миллат батIа гьечIо, регион батIа гьечIого. Такъсирчилъиги зулмуги цIикIкIунеб буго. Араб гIасруялъул 90 абилел соназул байбихьи нахъбуссунеб бугин ккола. ЦIикIкIунел руго экономикиял такъсирал, гIадамал чIвай, банкал талавур гьари».
Байбихьуда бицен гьабураб хIужаялде тIадруссани, Шихачевасдаги Хамутаевасдаги хурхун гьабсагIаталда Дагъистаналъул полициялда лъалеб жо гьечIо. Амма Москваялъул полициялъул баяназда рекъон, гьел кIиялго жеги Москваялдаго руго.
