Цолъарал миллатазул гIуцIиялъул генералияв секретарасул официалияв вакил Стефан Дюжаррикил лъазабиялда рекъон, ГIиракъалда 2200 чиясде холера унти бахун буго. Гьезда гъорлъан 20 гIанаб процент кколеб рагIула лъимал. «ООНалъул Лъималазул фондалъ» лъазабулеб буго ГIиракъалда нахъ тIамичIого тадбирал тIоритIулел ругин унти тIибитIизе биччангутIиялъейин.
Амма унти щваразул къадар бигьагьабун цIикIкIунеб бугин , ургъел загьир гьабулеб буго сахлъи цIуниялъул идараялъ. Унти щваразул къадар цIикIкIиналъе гIиллалъун кколеб буго, улкаялда загьирлъараб багIариялъул хIасилалда гIадамаз рукIа-рахъиналъул къварагIелазе чурукаб лъин хIалтIизаби.
2007 соналда ГIиракъалда букIана холераялъул эпидемия. Доб мехалда гьеб унти щваразул къадар бахана ункъ азаргоялдасаги цIикIкIун чиясде. Гьезда гъорлъан хун вуго 24 чи.